US Secy. of State Tillerson-i taruba hopta India semdangtsü

Washington/New Delhi, October 20 (Agencies): Taruba hopta US Secretary of State, Rex Tillerson-i India aser Pakistan na semdangtsü; paisa Saudi Arabia, Qatar aser Switzerland linüktem-a semdangtsü.
Tillerson-i asüng Saudi Arabia semdangtsü aser Saudi Arabia o Iraq na tsüngda Coordination Council senden nung adentsü, iba sülen pai Qatar semdanga linük lenirtem aser US mitkar ketdangsertem den kiralongra anema senteper raraba dak sendakba nung o lemteptsü.
Paisa Pakistan semdangba mapang nung linük lenirtem den linük ana dak sendakba onüktem jembitsü, iba sülen pai India semdangtsü.
New Delhi nung Tillerson-i India nunger lenirtem ajurua asalentong balala nung longjemer inyakba den külemi Indo-Pacific tesem nung security aser azükaru onüktem nung jembitsü.
“Secretary-i India semdangba mapang nung, tamalen June ita nung Ato kilonser, Narendra Modi-i White House semdangba mapang US Tir, Trump aser Ato kilonser nati bangjemba onüktem tejakleni bener aotsü atema jembitsü,” ta US ketdangsertemi ashi.