US Sikh teloki Punjab nunger kaketshirtem atema $210,000 bendentsü

Washington, October 6 (Agencies): Washington nung aliba timtemer aser sensaker yarir, ‘Sikh Human Development Foundation’ teloki Punjab nung alir kaketshirtem ano tuluba azüngtsü asoshi rongsen peria malirtem asoshi sen dollar 210,000 bendentsüogo.

Deobar nü iba tenla bendenba sentong nung pop kentener Jaz Dhami-i shilem agia liasü aser Washington kija nungi tejaoker parnok nisung 350 dak tema dena liasü.

SHDF yagi 2001 küm nungi Punjab aser temeküt nung alir tekolok tajung süaka sensaker kaketshir tem nem scholarship agüja arur.

Ajak dang mulungsoa tenlatsü ashidang SHDF Mendenbuba Gajinder Singh Ahuja, “Onoki nenok teyari aginer. Kaketshirtemi nü teyari nüngdaker,” ta ashi.

Iba sentong nung tongti tesemdanger, Gurcharan Singh Kanwal-i sen dollar 50,000 tenlaa lanurtem tuluba azüngtsü inyakyim nung yariba asoshi Kanwal aser kinüngtsü Kamaljit Kaur na nem ‘SHDF Community Higher Education Empowerment Award’ agütsü.

SHDF board züngsem, Manpreet Singh-i, “Tang tashi nung SHDF-i kaketshir 4,000 nem scholarship agütsüdar aser teloki yarir kaketshir 1,500 graduate süa mapa tajung inyakdar,” ta metetdaktsü.

Parnok 1,500 rongnungi karibo pei tanur reprangba den külemi SHDF nema tenlar.

SHDF scholarship ya nüngdaka alir nisung aser tekolok ajungba dak rangloker agütsür. Punjab aser temeküt nung aliba school aser college balala nungi kaketshirtem Delhi nung aliba SHDF ajanga kanga junga tendanga shimteterang iba maongka agütsür.

Iba teyari ya timbaka kaketshirtem kibong nung anogo ka nung sen dollar ka maateter tem nem agütsür.

Iba teyari ya Delhi nung aliba SHDF teno, Nishkam Sikh Welfare Council ajanga agütsür.