US sorkar jidaka lir; Tir Trump-i Democrats aitsür

Washington, Aenjeti 20 (Agencies) : 2013 küm sülen tan mezüngbuba US sorkar tejakleni bener moteti jidaka lir aser iba taiji Democrats telok nungi ozüng yanglurtem lir, ta US Tir, Donald Trump-i jashia metetdaktsüogo.
Donald Trump aser Congress na tsüngda senotsü enoktsü atema sentong yangluba nung haiaura ka dangi maruteti tang sorkar iba jenjang nung tepdaka lir.
Osang ajanga ashiba agi, Donald Trump US Tir mendeni tur küm ka ajungba anogomong ka nungang iba ya ataloker.
Rogonü ayatrem (par mapang) nungi sorkar inyakyim ajak amato anendaka lir anungji federal employees noklang aika mapang tatsüka atema mapai motettsü aser sorkar maparen aika anena atatsüsa akümtsü.
Taoba küm metsür pongu tsüngda asembenren tashi iba mesükba tensa tia (partial shut down) ya asemben atalokogo.
Jimmy Carter aser Ronald Reagan nunger yimsüsüba mapang nunga yamala meükba tensa ataloka liasü.
Aji oda süaka,kanga dang nüngdakba sorkar inyakyim karbo benener aotsüsa akümtsü saka uniformed service members, health inspectors & law enforcement officer-tembo sen mengui dang mapa inyaktsü.
Hombar tashi nung tangatettep kati marutetra federal employee meyi noklang aika sodi angutsü.
US sorkar asentenshir tenzüka motet tashi sepaitem densema public sector workers aika senmengui dangmapa inyaktsüsa akümtsü.
“Democrats purtemi linük kümzüka ayutsü bilemba dang nungibo kanga agia bendanglen nungi temelaba magii aruba nüburtem tsütsüang temulung agütsür,” ta Trump-i mepelaba olen ka twitter ajanga sangdongogo.
Temelaba magii inyakba atema US dang China jashir
Beijing, Jan 20 (Agencies) : US nungeri temelaba magii dang China anüolentip tsütsü missile kazüka yokba kol amenoka aliba rong senzüba atema jashir, ta tanü Honibarnü Cina sorkari metetdaktsüogo.
China nungeri par nüjiso temeten wazüka ayutsü atema nüngdakba maparen inyaktsü, ta tongpang nung amshiba jahaz tenüng agi ‘USS Hopper’ temelaba magi dang mile 12 songtema tzüyim nung jajaba sülen Chinese Foreign Ministry nungi otongdar, Lu Kang-i metetdaktsüogo. USS Hopper-ji Bodhbar nikongdang Scarborough Shoal longa jaja.
Scarborough ta ajaba tashishitep aliba tesem ya China nungeri 2012 küm Philippines nunger ket nungi rakzük.
Iba dangji China nungeribo Huangyan asetkong taka ajar aser iba yaPhilippine nungeri Luzon asetkong nungi kilometer noklang ana shi pilar lir.
Defense Ministry nungi otongdar, Wu Qian-i ashiba agi, China nungeri rong ka yoka US nunger jahaz aruagi alibaji kuli tejangja ngutet aser parnok dang tesemji toktsür oadokang ta tekümdangtsü metetdaktsü.
South China Sea kübok kecha tesema parnok kübok mali ta United States-i ashir saka international law nung ajemdaker kechi nung mangatettep ali, ibajibo yimjung nung dang angatettepdaktsütsü atema parnoki meranger ta metetdaktsüogo.