US sorkari Ukraine nem teyari sen mn 220 agütsütsü nangzüker

Washington, June 16 (Agencies): US sorkari Ukraine sorkar nem teyari sen dollar sen million 220 tashi agütsütsü tenangzükba ka tanü, Brehostibar nü metetdaktsüogo.
Ukraine linük indang rongsenren jenjang tajungba kümdaktsütsü aser par linük nung nungdakba yimtenren aser energy tashi den sentakba temelenshi takok ngua agidaktsütsü nükjidong nung US sorkari tan teyari senji agütsütsü renemer lir.
US semdangsang, Ukraine Ato Kilonser, Volodymyr Groysman-i US Tatong Tir, Joe Biden den ajurutepa senden ka tanü amenba sülen US sorkari Ukraine sorkar nem teyari senji agütsütsü lemteta liasü.
“Groysman-i Ukraine lenisütsü menden benoker ita 2 tsüngda nung par Cabinet tajungba küma melenshiba atema pelaba olen ka Tatong Tir, Biden-i lemsatepba den külemi, par Ukraine-i temelenshi tajung agitsü asoshi renemba mapatong ajunga nung US-i nungita yaritsü tenangzükba ka tanü senden nung metetdaktsüogo,” ta White House-i tesülen sangoktsü.
“Ukraine sorkari Ukraine anüdoklen alir nüburtemi sorkar anema nokdaka lendong atalokdaktsüba khuret ajurushiba atema tebilemtsü akar,” ta shia, Ukraine-i sorkar anemer den taküm 2016 küm tetenzüklen agiba yimjung tezüngzüktep mapa küma inyaktsü tajungshiba olen ka Biden-i Groysman den lemsatepa liasü.
Ukraine sorkar aser Russia-i pusema nungitba Ukraine sorkar anemer na tsüngda tongpang rarabaren anena par linük tensa tajungba kümdaktsütsü nükjidong nung par telok anati Belarus yimtiba, Minsk nung yimjung tezüngzüktep ka taküm February ita agiba osang jangjaogo.
Ano, Russia-i Minsk yimjung tezüngzüktep mapa küma inyakba kuli anguba sülen ang par linük anema benokba tenokdangba sentong agientsü renemba osang ka Biden-i tanü senden nung metetdaktsü.
Russia-i Ukraine ket nungi Crimea peninsula tashiyim agi agiba aser par mitkartem yoka Ukraine sorkar anemer nungita yariba ken o nung ajemdaker, US densema, West linüktem aser European Union (EU)-i Russia anema tenokdangba sentong benoka lir.