US & South Korea kümdangtsü asoshi missile khadok: Kim

Seoul, Luroi/August 07 (Agencies): Lenir Kim Jong Un-i ketdangsüa tang tasen yangluteta aliba short-range ballistic missiles khadokba ya United States aser South Korea longjemer military exercise agiba atema tekümdangtsü metetdaktsüba ka lir, ta North Korea-i Bodhbarnü metetdaktsü.
Anüolen aliba tayimtsü anendak nungi missile ana khaloktsüba ya linük alema aser linük yimtiba, Pyongyang temeket nung aliba alema orr anüdoklen tzüküm anasa asetkong ka nung shidak oa kongshi, ta North Korea sorkar meyong Korean Central News Agency ajanga ashi.
Nuclear ken o jembiba nung anendaka aliba mapang aser North Korea-i US tembar South Korea aser Japan aser yangji par military base tem nung kongshitettsüsa missile tendangaka Tir Donald Trump-i süoki ia bilemba mesayuba mapang hopta ana tsüngta Pyongyang-i nok-o-nü pezü sayuogo.
North Korea indang nok-o-nü Trump-i süoki ia magizükba ajanga linük ana tsüngta ken o mejembi tsüngta tashi tuluba aketba hadir yanglutettsü melar, ta aikati ashi. North Korea aser US na tsüngta iba ken o ya ita tatemi jembi tenzüktsü amai lir.
North Korea-i tawa missile tendangba ajanga yimjung asoshi terenlok lenmang mesayuteter aser Korea linük ana tsüngta taoba küm tezüngzüktep yangluba ama Pyongyang-i inyaktsüla, ta South Korea indang Unification Ministry nungi odongtar Lee Sang-min-i ashi. Mitkar tebilemtsü ajema kümdaktsütsü ken o jembitsü asoshi joint military committee ka tentettsü taoba küm Korea linük ana pangjemtep.
Mongulbarnep tendangba missile nung Kim temulung asür aser iba ajanga United States aser South Korea longjemer Hombarnü nungi tenzüka military exercise agiba atema tekümdangtsü osang tapet agütsür, KCNA-i ashi.
Anepbongi ballistic missile mesükba ana khadokba lazük, ta South Korea mitkartemi shir anogo ka lir KCNA ajanga iba osang ya sangdong.
Iba missile ya ali nungi kilometer 37 shi pilar kilometer 450 shi ao aser linük anüdok tzüküm anasa tzüyim nung tsük, ta Seoul Joint Chiefs of Staff ajanga ashi. Kasa ya North Korea-i July 25 nunga tendanga liasü.
Washington aser Seoul longjemer military drill agiba North Korea-i aija lir. South Korea-ibo iba maparen Hombarnü nungi tenzükogo ta ashir, saka iba dak alaka osang tejangja memetetdaktsü.