US Tatong Tir, Joe Biden-i Iraq semdanger

Baghdad, April 28 (Agencies): United States (US) Tatong Tir, Joe Biden-i mapang jilia semdangtsü osang kecha memetetdaktsüi Iraq ajungbena tanü, Brehostibar nü semdangogo.
Islamic State (IS) kiralongrar telok anema rarabaren nung par US-i Iraq sorkar aser mitkartem maneni pusema nungiter ta sayutsü nükjidong nung Biden-i tanü Baghdad tonga aoba osang jangjaogo.
US-i aniba alima teloktep mitkartem nungi teyari agia, Iraq miktartemi IS telok anema takok angutsü tenzüka lir.
Biden-i tan Iraq semdangba ya US-i Iraq nungi par mitkartem 2011 küm anitetadokba sülenbo US Tatong Tir kati tan mezüngsüa Iraq semdanger lir.
Ano, tan April ita kija nung Iraq semdanger US tongti lenirtem rong nung Biden ya tasembuba lenir akümer.
IS teloki 2014 küm nungi tenzüka lendong tsüdong aser amakba maparen kanga sashia inyaktsü tenzük aser Iraq aser Syria na indang lushi tuluba ka tashiyim agi agiadok.
Ajisüaka, Iraq mitkartemi Ramadi yimti densema, IS telok ket nungi lushi tuluba tanaben agishiba osanga jangjaogo.
Biden-i tan Iraq semdangba ajanga Iraq mitkartemi IS telok madak takok ngua raratsü tenzükogo ta White House-i bilemba kulia angur lir.
Biden-i tan Iraq semdangdang Iraq lenirtem den ajurutepba osanga jangjaogo.
Biden-i Iraq lenirtem den tesendaktep tajung yua, parnok den anogo 10 nung kenbo tongtepratepba osanga angazükogo.