US Tatong Tir, Joe Biden-i Palestine lenirtem aitsür

Israel Ato Kilonser, Benjamin Netanyahu (Abelen)-i par linük semdangsang, US Tatong Tir, Joe Biden den Jerusalem yimti nung tanü, Bodbar nü ajurudang agiba noksa ka yangi angur. (Jerusalem, March 09)

Jerusalem, March 09 (Agencies): US Tatong Tir, Joe Biden-i Palestine lenirtem aitsüba olen ka tanü, Bodbar nü metetdaktsüogo.
Biden-i Israel Ato Kilonser, Benjamin Netanyahu den senden ka amenba sülen osangbener den aroki ajurutepdang tanü iba aitsüba olenji metetdaktsü.
Palestine nungertemi US senso ka densema, nisung ishika Jerusalem nung yashi, Mongolbar nü amakba sülen Palestine lenirtemi lendong atalokdaktsüba maparen maitsüba atema Biden-i Palestine lenirtem aija liasü.
“Tan amala lendong atalokdaktsüba ya tamendakdak maliba aser tesempatsü maparen lir,” ta pai shisem.
Ano, Israel aser Palestine na tsüngda yimjung tezüngzüktep agitsü tajungshiba olen ka Biden-i tanü senden nung lemsatepba osang jangjaogo.
Israel linük kümzüka ayutsü maparen nung par US-i Israel maneni nungita yaritsü nangzükba den külemi, Iran-i par US densema, alima tashi abenba linüktem den yaküm agiba nuclear tezüngzüktep anema inyakra, Iran nem tapet telangzüba agütsütsü renemba osang Biden-i metetdaktsü.
Biden-i Netanyahu den ajurutepba sülen Palestine Tir, Mahmoud Abbas dena tanü ajurutepba osang jangjaogo.
Pai maneni Jordan asüng, Brehostibar nü semdanga Jordan Chuba, King Adbullah II dena ajuruteptsü sentong renema lir.
Israel police ketdangsertemi tongpang nung amshitsü prangpong bener lendong atalokdaktsütsü meranger Palestine senso 2 injang agi kasetba aser West Bank nunga Israel mitkartemi kotari agi Israel mitkartem tsüngsettsü meranger Palestine senso tanga ka injang agi tanü kasetba osang jangjaogo.
Yashi, Mongolbar nüa Palestine senso kati America nunger raliwalir, Taylor Allen Force tepsetba den külemi, Isreal nunger nisung 12 tashi yirutsüba osang bushitetogo.
Biden-i taoba Isreal Tir, Shimon Peres den senden amenba mapang nung yashi lendongji atalokba osang jangjaogo.