US Tatong Tir, Joe Biden-i Turkey linük semdanger

Ankara, August 24 (Agencies): US sorkari Turkey mitkar telok kati par linük indang yimsüsütsü tashi tashiyim agi agitsü sentong renemba osang mapang jilia memeteti aliba olen ka US Tatong Tir, Joe Biden-i tanü, Bodbar nü metetdaktsüogo.
Turkey linük semdanga par Ato Kilonser, Binali Yildirim den Ankara yimtiba nung senden amenba sülen osangbener den aroki ajurutepdang Biden-i iba olenji metetdaktsü.
“Ozü linüki Turkey mitkar teloki linük indang yimsüsütsü tashi tashiyim agi agitsü sentong renemba osang mapang jilia memeteti liasü. Ozü sorkari iba ama linük anema nokdaktsü maparen kodanga nungita meyaritsü,” ta pai nenshia ashi.
Turkey nung democracy yimsüsütsü inyakyim tali tashi itshitsü maparen nung par US sorkari Turkey sorkar nungita yaritsü nangzükba den külemi, par linük den tesendaktep junga ayutsü alizüng ayuba olen ka Biden-i tanü lemsatepa liasü.
North Atlantic Treaty Organization  (NATO) nung züngsemba tongti linük, Turkey-i par mitkar aser tongpang osettsüset yoka, Syria nung tentetba Islamic State (IS) kiralongrar aser Kurd kin nisungtemi tentetba telungpurtem anema kanga sashia raratsü tenzükba mapang ka nung Biden-i tan Turkey linük semdanger lir.
Biden-i Yildirim den ajurutepba sülen Turkey Tir, Recep Tayyip Erdogan dena ajurutepa senden amentsü sentong renema lir.
Par linük anati aroki lungjemer IS telok madak takok ngua raratsü onük Biden aser Erdogan nati tongtipangsüa benoka jembitsü renemba osanga angazükogo.
Ano külen, Turkey linük indang yimsüsütsü tashi tashiyim agitsü merangtsüsa mitkartem ajungmesosang ta Turkey-i temulung melemi bilemsang, Fethullah Gulen par Turkey nem amoktsütsü takhangba olen ka Erdogan-i tanü US den tanaben benokshiba osang jangjaogo.
US nung jenoka alisang, arishi küm 75 tain Gulen Turkey sorkar nem amoktsüsü mesüra mamoktsütsü telemtetba par linük ana tsüngda agiba aibelenertem linük ka nungi linük tanga kati anir aotsü den sentakba tezüngzüktep dak ajemdaker inyaktsü renemba olen ka US Justice Department-ia metetdaktsüogo.