US Tatong Tir Seoul nung lir; N. Korea atema jembitsü

Seoul, April 16,  2017 : Deobarnü U.S. Tatong Tir Mike Pence (abelen)-i Seoul, South Korea nung aliba ‘National Cemetery’ nung teronem  menemba  long arongba noksa nung angur.

Seoul, April 16 (Agencies) : US Tatong Tir, Mike Pence Deobarnü South Korea tonga lir aser pa yangi anogo asemnü monga North Korea-i lendong agütsütsü aliba metetdakja security akangshitsü indang jembitsü, ta ketdangsertemi ashi.
Seoul nungi kilometer 70 pilar aliba Pyeongtaek nung US indang tayimtsü anenba tesem atongba sülen Pence Seoul nung aliba ‘National Cemetery’ oa, 1950 nungi 1953 tashi Korea nunger rara nung yaritepba tali shisadaktsütsü asoshi semdangtsü, ta osangbenertemi ashi.
Tang Korea peninsula nung mepetmesü adoka aliba mapang ka nung January ita Tatong Tir akümsang Pence-i tan mezüngsüa Asia semdangerba lir.
Deobarnü Pyongyang-i ballistic missile ka tendangba takok mangu aser ano parnoki nuclear tanga ka tendangtsü renemshiba mapang ka nung US-i Kim Jong-un dang tashi sayutsü asoshi Korea nunger tzü tashi ‘aircraft carrier strike’ telok ka yokogo.
Honibarnü Pyongyang nung military parade aliba mapang North Korea-i intercontinental ballistic missiles asem tashi sayua liasü.
Pence-i Hombarnü South Korea nung Tir mapa khen atema benloka alisang aser tang Ato Kilonser teinyakdak Hwang Kyo-ahn aser National Assembly Speaker Chung Sye-kyun na den ajuruteptsü.
Pyongyang-i nuclear amshiba anendaktsütsü asoshi linük ana lokteper North Korea den agatetteptsü merangtsü mesüra tenokdangba kar agütsütsü, ta osangbenertemi ashi.
Pence-i Hwang dang North Korea indang inyakyim-a rasaa ashitsü akok aser Korea peninsula nung ‘US missile defence system’ tamenokdak aliba indanga jembitsü.
Linük ana senteper ‘Terminal High Altitude Area Defence’ dak sendakba nung Beijing dang South Korea den shishilemba nokdanger aliba lapoktsü ashitsü.
Hwang aser Pence na olemtep tembangba sülen North Korea dang parnok tesendaktep meraksai tashi ita lir ta sayutsü asoshi linük ana senteper sangdong ka sangdongtsü.
Mongulbarnü Pence-i Korea nung aliba American Chamber of Commerce-i ayongba senden ka nung o jembitsü.
March 10, 2017 nü Park Geun-hye Tir mapa nungi anendaktsüba sülen linük security atema shishia bilemja tawa tanü ka US nung tongtibang ketdangsertemi South Korea maneni semdangdar.
US Secretary of Defense James Mattis aser Secretary of State Rex Tillerson natia February aser March ita tem nung Seoul semdangogo aser ibaji ajanga South Korea aser US na tsüngda defence tsütsü tashi ita longjemer aliba tali jungkai adoka sayur.
Mongulbarnüsa Pence Japan-i apusotsü aser iba sülen Indonesia o Australia nata semdangtsü.