US Tir, Barack Obama-i Cuba linük semdanger

US Tir, Barack Obama (Tiyongtsü); kinüngtsü, Michelle Obama; jala 2 – Malia o Sasha na aser Michelle tetsü, Marina Robinson nungeri tzünglu nem ajadakja Cuba kübok Old Havana semdangba noksa ka yangi angur. (Havana, March 21)

 Havana, March 21 (Agencies): Küm 50 dak tema tesendaktep mejungi arur külen US aser Cuba linük na tsüngda tesendaktep junga yanglutsü nükjidong nung US Tir, Barack Obama-i Cuba linük tanü, Hombar nü semdangogo.

Obama-i Cuba tonga aoba sülen Cuba Tir, Raul Castro den Havana kübok Palace of the Revolution kilung nung ajurutepa senden amenba osang jangjaogo.

2013 küm South Africa lenir, asür Nelson Mandela den agiba asü pila sentong nung aser yaküm, 2015 küm April ita Panama nung ajurutepa densema, Obama o Raul nati tan agi 4 benbuba tsüngdong ajuruteper lir.

Obama-i kinüngtsü, Michelle Obama aser jala 2 – Sasha o Malia na anisemer tan Cuba semdangba sülen küm 90 shi nung Cuba semdanger mezüngbuba US Tir kümogo.

Obama aser par kibongi tzünglu nem ajadakja Old Havana aser Havana Cathedral semdanga senzüba osanga jangjaogo.

Obama-i tanü Raul den ajurutepa senden amenba den külemi, Cuba nung alir shishilembartem dena senden ka mena par US aser Cuba na tsüngda tesendaktep junga yanglutsü onük benoka liasü.

Obama-ia asüng, Mongolbar nüa US aser Cuba nüburtemi amalitepa alitsü aser Cuba nüburtem taküm jenjang tajungba kümdaktsütsü onüka jembitsü sentong renema lir.

Cuba sorkari memulungaka, Obama-i nübur temeten atema nokdakertem densema, Cuba nung tentetba lokti tentet balala nungi lenirtem dena ajuruteptsü sentong renemba osang angazükogo.

Obama den külemi tan Cuba semdanger rong nung Republican yimtenren telok nungi yimsüsür 5 tashi densema lir.