US Tir, Barack Obama-i Greece linük semdanger

Athens, November 15 (Agencies): US Tir, Barack Obama-i anogo 2 agia semdangtsü nükjidong nung Greece yimtiba, Athens tanü, Mongolbar nü tonga ogo.
Obama-i tan Greece semdangba ya pai US Tir menden toktsüba jakdang, Tir ka ama tan Europe tatemsüa semdanger asütsü.
Obama-i tan Greece semdangdang, pa tashi amshia, alima linük aser tentettemi Greece nem aputsüba sen tanaben meyipa magitsü ajungshitsü nangzüka lir.
Tawa US Tir election nung takok angusang, Donald Trump-i taruba 2017 küm January ita melenzüktsü alisang, Obama-i tanü Athens tonga aoba sülen Greece Defence Minister, Panos Kammenos-i Obama Athens Airport nung agizüka liasü.
Tesüiba US Tir, Bill Clinton-i 1999 küm semdangba sülenbo Obama ya Greece mezüng semdanger US Tir akümer lir.
Obama-i tanü Athens yimtiba nung Greece Ato Kilonser, Alexis Tsipras aser Tir Prokopis Pavlopoulos na den senden mapang balala nung mena, Greece linüki sentsü atsüa aliba aser migrant nisungtem den sentakba onük tongtipangsüa benoka jembiba osang angazükogo.
“US lenisang, Obama-i tan ozü Greece linük semdangba ajanga ozü linüki atsüa aliba sentsü odoktsüren nung khuret pongbatsü imlar kechiyong pai Tir menden toktsüba jakdang ozü linüki ajurushia aliba senotsü tebilemtsü bentettsütsü nangzüka lir,” ta Greece sorkar otongdar, Dimitris Tzanakopoulos-i metetdaktsü.
Par linüki ajurushiba rongsenren jenjang tamajung agientsü nükjidong nung Greece linüki dollar sen billion 93 shi 2015 küm tomlen apua liasü.
Rongsenren jenjang tamajung ajuruba den nütsüng yongsük nisung million 11 shi aliba Greece linüki migrant aser refugee nisungtem den sentakba khureta benoktsüsa tang tia ajurua lir.