US Tir, Barack Obama-i Hiroshima semdangtsü

Washington, May 10 (Agencies): US Tir, Barack Obama-i tan May ita tatembanglen Japan semdangdang Hiroshima yimtia semdangtsü sentong renemba osang ka tanü, Mongolbar nü metetdaktsüogo.
World War II (WWII) tongpang anentsütsü nükjidong nung US mitkar tayimtsü kati Hiroshima yimti nung 1 buba atom bomb tsükdakja nisung meyirijang jenti khen nung tepsetba sülenbo Obama Hiroshima semdanger mezüngbuba US Tir akümtsü lir.
Hiroshima semdangba ajanga tesüiba mapang atom bomb pokdaktsüba atema taidok meshir ta aibelena mangazükdaktsütsü tangtetba nung US Tir menden abener lenirtemi küm 70 tashi Hiroshima aser 2 buba atom bomb pokdaktsüba yimti, Nagasaki mesemdangi aru.
Ajisüaka, Obama-i Japan nung tan May ita 21-28 nü tashi amentsü ayongba Group of Seven (G7) senden nung shilem agitsü asoshi Japan semdangdang US Tir kati tan mezüngsüa semdanger küma, pai Hiroshima yimtia semdangtsü sentong yanglur lir.
Aji oda, alima ajunga nung tongpang nung amshitsü nuclear osettsüset mamshi yimji yimjung lidaktsütsü mapatong den sentaktepa Obama-i Japan Ato Kilonser, Shinzo Abe den aroki tan May ita tatembanglen Hiroshima yimti semdangtsü sentong renemer lir.
US-i Hiroshima aser Nagasaki yimti na nung atom bomb pokdaktsür anogo 9 süir külen Japan chuba, Emperor Hirohito-i par Japan-i joko tongpang meraratsü lemtetba osang sangdonga liasü.