US tir, Donald Trump menden nungi atsüngdoktsü asoshi zülu

Washington, July 13 (Agencies): Bodhbarnü US nung Democratic züngsem kait tir, Donald Trump menden nungi atsüngdoktsü asoshi ken o benok, saka iba maparen ya takok mangutsü südi, kechiyong US Congress nung Republican telok nungi züngsem timba lir.
California nungi Democrat züngsem, Brad Sherman-i taoba ita US tir menden nungi atsüngdoktsü asoshi amokmerenba ama United States tir, Donald John Trump-i mapa tamajung inyakba ken o benok.
Trump tir atema election nübuyim mapang Russia den tesendaktep liasü, ta temolung malemba ken o ka bushisüngdangba maparen nung tetsükdaktsü agütsütsü merangba ajanga obendang shidak magütsüteter, ta Sherman-i sangdong.
“Donald Trump Jr-i tang tesüsa temai adokdaktsüba osang nung Trump nübuyim mapang Russia nungi teyari agitsü melunga aliba sayur,” ta Sherman-i ashi.
“Tang mapa nungi anentsür alisang, National Security Advisor, Michael Flynn aser Russia-i shilem agiba ken o bushisüngdangba maparen nung tir-i langka miimbanga ayutsü meranger amai sayur,” ta pai shisem.
“Ni amanger, Trump-i FBI Director, James Comey mapa nungi anentsüba aser pa den sensaksemba ajanga obendangba nung tetsükdaktsü aludaktsür,” ta Sherman-isa ashi.
Sherman-i benokba ken o indang asüngdangdang White House nungi kicha telangzüba magütsü.
“Iba ya kanga temenünütsü mapa ka aser yimten yimsüsüba nung inyakyim tamajungtiba lir,” ta White House indang odongtar, Sarah Huckabee Sanders-i ashi.
Richard Nixon mapa nungi anendaktsütsü asoshi House Judiciary committee-i July 27, 1974 küm agizükba ken o den mesüktepa zülua lir, ta Sherman-i ashi. Nixon ya anogo 13 lir menden nungi pasasa alu.
Tang tashi nung iba ken o nung Democrat züngsem, Al Green-i dang sign süa lir.
Iba ken o bushisüngdangtsü asoshi Trump renema aliba osang kicha House of Representative mesüra Senate nungi mashi.