US Tir Election

Alima nung tashi tulutiba aliba linükji US lir, anungji alima nung tashi tulutiba aliba nisungji US Tir asütsü südi. Ibayongji US Election ya America nunger atema dang masü saka alima linüktem atemaa tongtibang lir. Tanü November 8 nü US Tir Election agidang alimai Democratic candidate, Hilary Clinton asü Republican candidate, Donald Trump Tir akumtsü ta repranga atadar. US Tir election küm 60 putiotsü nung otsü tasen ka yanglubaji, taküm September ita tatemlen alima nung nisung million 84 dak temai pei kidang TV nung Hillary aser Trump na o toktepba sentong repranga liasü. Iba dak alia party tem, bars, restaurants, office nungi repranger aser website ajanga live streams repranger nisung million aika liasü. Taoba US secretary of state, Hilary-i tayongzükbatem koktettsüsa aika ajangshia lir, ajisüaka Donald Trump-i takok ngura ajak atema shisabulutsü ka asütsü ta bilemer. US ya alima nung tashi tulutiba linük asü nungji par linüki alima tayongzükbatem atema tuluka inyaktsütsü akok mesüra teraksaba ang tali bendenloktsütsü akok. Bushisüngdangba tasen ka ajanga America nunger shilem 70-i Trump dak tamajung reprangteter aser iba nungjagi shilem 56-ibo pa kanga anemer, ta metetdaktsü. Kasa survey ajanga, tenüng züluoka aliba voters dang nungi telangzüba ajanga bushitetba agi, telangzür shilem 69-i Trump dak tamajung reprangtet aser shilem 31-i pa dak tajung reprangtet; kasa shilem 56-i Hilary dak tajung reprangtet aser shilem 43-i la dak tamajung reprangtet. Tang alima nung tayongzükba onüktem aika lir, ano Trump-i takok ngura tebilemtsü taliba bendenloktsü südi ta aikati bilemer. Alima lenirtem dak taremzükba shisatsü, tesüngjem shisatsü, atasaba shisatsü aser teshisadangba nüngdaker, saka Trump dak iba shisatsü maliba pa taküm yimya agi sayur. Anungji Trump Tir kümra US atema jenjang majungba dang masü saka alima atema lendong asütsü ta mongintemi bilemer. Tan putu nung telemtetba agiba nung kijai masü saka ajak densem nungang US-i nükjidongtem tongtettsü ta Hilary-i bilemer, aser la secretary of state inyakba mapang nunga lai iba tangatetba nung inyaka aruogo. Tang US nung aser alima nung tayongzükba jenti ajurua lir, aser itemji koktettsüsa yimtenren nisung ka ama Hilary dak tashi lir. Ano külen Trump-ibo kijai tashi amshitsü südi ta aikati arendaka bilemer. Linük kari nuclear amshitsü amokmerenaka alima meimbayong tashi aliba linüktemia yimjung atema dang inyaker. Iba ama mapang ka nung Hilary-ibo nuclear mamshitsü, ta la dak melung alemer, saka Trump dakbo melung alemtsüsa masü. Trump Tir kümra tarutsü tiaji koma ka asütsüar mejangar. Pai tangar tangatetba akhüm metsübur, pai melungba dang inyakner, raraba osettem meimer, America kija atema bilemer, anungji pa Tir kümra alima nung lendong adoktsüsa tensa ka arutsü südi. Election ya nüburtemi yimsüsürtem shimtsü atema agutsüba temeten ka lir. Election mali nungbo akhidang nungi yimsüsüa arur tamarener kibongtemi pei senmang ama dang tanen makai yimsüsüa aotsü, mesüra tamajungertemi tashiyim amshia tanen makai yimsüsütsü. Iba ama tia majurutsü atema yimtenren mongintemi ‘democracy’ yimsü tajung ya bener aru. Anungji lenir tajung shimtetra nüburtemi moa asütsü, lenir tamajung shimtetra nüburtemsa akoksatsü. Tang alima nung makmakshimak tulu lir iba den külemi alima tatsükba akumba, chiyungtsü tebilemtsü, sensak tia, ayawara aser rara tulu adoktsüsa aliba tensa ka nung item tebilemtsü atema shisaa kaa inyaktsü aser rara nokdangtettüsa US Tir dak tashi tulu lir.  Ajioda alima meimba lenir kati takok angutsü nüburtemi imlaa atadar.