US Tir election agi tenzükogo

Washington, November 08 (Agencies): America nung alir nüburtemi par Tir tasenba shimtsü atema pei vote agüja, election sentong nung tanü, Mongolbar nü shilem agiogo.
Tanü election sentong tembangba jakdang, tatemsüa nüboyimtsü maparen inyaka, Democrat yimtenren telok nungi US Tir candidate, Hillary Clinton aser Republican candidate, Donald Trump nati vote agütsütsü ajungshia liasü.
“Tan election ya asen putu nung tetendangba tulutiba lir,” ta Clinton-i metetdaktsü aser “Tanü ya asen linüki nüchiso anguba anogo lir,” ta Trump-i sangokja, par nüburtem ayonga election nüboyimtsü maparen tembang.
North Carolina aser Michigan na nung vote agütsütsü maparen tembangba jakdang, Clinton-i New Hampshire kübok Dixville Notch jila nung vote timba ngua, Trump madak takok anguba osang angazüka liasü.
US kübok densemba state 50 aser District of Columbia nung vote agütsütsü mapatong taonung 8:00 ako tashi nung tembangba sülen ang vote-ji azüngtsü sentong renema lir.
“Clinton ya alima ajunga nung lenirtemi aküm agüja, temaba jenjang nung züngoker yimsüsür ka lir. Lai yimtenren sabang nung tetendangba ajunga koktetogo,” ta shia, US Tir, Barack Obama-ia Clinton pusema, la nem vote agütsütsü asoshi nüburtem ajungshia liasü.
Obama-i US Tir menden 1 buba kümsük abendang, Clinton-i Secretary of State ama par linük tenzük.
Ano külen, tanü election agiba jakdang vote agütsütsü lenmang lapoktsüba maongka ajangzüka, America nunger nisung million aikati tanü election agiba jakdang anogo ishika tejaklen nungi tenzüka, par vote mapang jilia agütsüba osanga jangjaogo.