US Tir, Obama-i otsüsütsüsüa Hiroshima semdangogo

Hiroshima, May 27 (Agencies): US Tir, Barack Obama-i Japan kübok Hiroshima yimti tanü, Hokolbar nü semdanga, küm 70 shi tejaklen atom bomb pokdaktsüdak semdanger mezüngbuba US Tir küma otsü yangluogo.
“Alima ajunga nung Japan kübok Hiroshima yimti nung alirtemi tesüiba mapang ajurushiba amala timtem toushi majurudaktsütsü asoshi alimai nungdakba maparen inyaktsü nungdaker,” ta shia, Obama-i World War II (WWII) tatembanglen atom bomb pokdaktsüba ajanga asürtem nem aküm agüja liasü.
“Asenoki tanü iba yimti tiyongtsü nung nokdaker tesüiba mapang atalokba bomb lendong indang bilemteter. Tongpang raraba ajanga nisungtem asüba indang asenoki bilemteter aser tai maketba nüburtemi ola madokteti timatemba asen nüklai arur,” ta Obama-i temulung shiranga ashi.
Alima rongsenren terenlok ngua aliba linük 7, G7-i par senden tembanga amenba sülen Obama aser Japan Ato Kilonser, Shinzo Abe nati Hiroshima nung tentetba Memorial Peace Park aroki semdanga idakji agiba atom bomb lendong nung asürtem aser timatemertem bilemtetba sentong nung tanü shilem agia liasü.
US mitkartemi ketdang asüba tayimtsü kati mezüngbuba atom bomb Hiroshima nung 1945 küm August ita 6 nü tsükdakja nisung meyirijang jenti khen nung poksetdaktsüba den külemi, tarutsü putu ishika tashi nüburtem radiation mim tango ajanga shirangdakja liasü.
“Asür mang ayimtsü atema asenok tanü yangi sentepa lir,” ta Obama aser Abe nati Peace Memorial nung atom bomb lendong nung asür nüngtem nung azüngba nüngshilung nung narozük yuja asür nem aküm agütsüdang metetdaktsü.
Obama-i asür nem aküm agütsüba sülen atom bomb lendong nung taküm kümzüker ana – arishi küm 91 tain Sunao Tsuboi aser arishi küm 79 tain Shigeaki Mori na den ajurutepa tena den sensaksema liasü.
Ajisüaka, Hiroshima aser tesülen, Nagasaki na nung atom bomb tsükdakja lendong atalokdaktsüba atema Obama-i taidok memeshi aser Abe-ia taidok meshitsü asoshi onük mebenokba osang angazükogo.
Tesüiba mapang lendong atalokba bilemtettsü nükjidong nung masü saka alima ajungai tongpang nung amshitsü nuclear osettsüset yanglua kasaji rizüngba mapatong anentsü osang prokshitsü nükjidong nung Obama aser Abe nati tan aroki Hiroshima semdangba osang jangjaogo.