US Tir, Obama-i Pope Francis White House nung agizüker

US Tir, Barack Obama aser Catholic tamangba yimsü lenisang, Pope Francis nati Washington kübok White House kimalen, South Lawn nung agiba Francis pela agizükba sentong nung aroki shilem agiba noksa nung angur. (Washington, September 23)

Washington, September 23 (Agencies): US Tir, Barack Obama-i alima ajunga nung Catholic tamangba yimsü benshir lenisang, Pope Francis Washington kübok White House nung tanü Bodbar nü pela agizükogo.
White House kimalen, South Lawn nung agiba Francis pela agizükba sentong nung nisung 15,000 shi shilem agia liasü.
“Na pope ka asüba dang masü saka nü dak jakla yimya tajung aliba ajanga America nungeri na kanga pela agizüker,” ta Obama-i shia Francis tanü agizüka liasü.
“Ozü lenisang, Obama o Francis nati tanü Oval Office kilung nung senden amendang lokti tentet aser rongsenren sabang nung tebendang aliba agientsü aser alima tali tatsükba akümba ajanga alima tsüngsang mupong balaka küma melenshiba den sentakba onük benoka jembi,” ta White House Press Secretary, Josh Earnest-i metetdaktsü.
Ano, tamangba yimsü dak ajemdaker nütsüng yongsük ajema alirtem ajemrepba talisa, Middle East nung Islamic State (IS) kiralongrartemi Christian aser Yazidis nisungtem tepseta merenshiba den sentakba onüka Francis-i tanü benok ta Deputy National Security Advisor, Ben Rhodes-ia tanü osangbener den ajurutepdang metetdaktsü.
Pei linük toktsür bendanglen jenoka alirtem, tawa Iran den nuclear tezüngzüktep agiba aser US o Cuba na tsüngda tesendaktep tanaben tajungba küma yanglushitsü tenzükba onüktema tanü lenir anati benokba osang jangjaogo.
Ajisüaka, metetsümonga tetsür tebok nung aliba tanur raksa indokba aser tebur o tebur mesüra tetsür o tetsür na kibong akümtsü den sentakba onük nungbo Obama aser Francis na indang tangatetba balala aliba osanga jangjaogo.
Taoba anogo 3 agia kidangsüa aliba Cuba linük semdangba sülen yashi, Mongolbar nü nungi tenzüka US semdangsang, Francis-i asüng, Brehostibar nü US Congress senden nung o jembitsü sentong renema lir.