US Tir, Obama-i Southeast Asia linüktem yaritsü nangzüker

Manila, November 17 (Agencies): US den Asia-Pacific tesendaktep tajung yanglua aliba Southeast Asia linüktem indang tzüyim shilemtem kümzüka ayutsü maparen tajungba kümdaktsütsü nükjidong nung US-i teyari agütsütsü tenangzükba ka US Tir, Barack Obama-i tanü Mongolbar nü metetdaktsüogo.

Philippines yimtiba, Manila nung Philippines lenirtem den ajurutepba sülen Obama-i iba tenangzükba olenji tanü sangoktsü.

US-i taruba küm 2 tsüngda nung Philippines nem dollar sen million 79, Vietnam nem sen million 40, Indonesia nem sen million 21 aser Malaysia nem sen million 2.5 agütsütsü nangzükba densema ajak agi teyari sen million 259 shi par linük den Asia-Pacific tezüngzüktep ayuba linüktem nem agütsütsü asoshi Obama-i tanü nangzük.

Ano, US-i par Coast Guard cutter rong 1 aser research rong 1 densema tongti rong 2 tashi Philippines nung yutsütsü renemba osang ka Obama-i tanü metetdaktsü.

Obama-i tanü Manila tonga aoba sülen Philippines tzüyim mitkartem indang tongti rong, BRP Gregorio del Pilar ajishima liasü.

Iba rong ya mezüngbo US Coast Guard meyong liasü saka tanübo iba rong ya kiralongrartem mita parnok den raratsü aser China den mangatettep ken o adokba South China Sea nung duty senzüdaktsüba osang jangjaogo.

“Southeast Asia nung tensa azüoka alitsü asoshi ozü US den tesendaktep ayutsü aser linüktem indang tzüyim mitkartem tashi ita alitsü nungdaker,” ta Obama-i tanü ashi.

Manila nung ayongba Asia-Pacific Economic Cooperation (APEC) Summit senden nung shilem agitsü asoshi Obama-i tan Philippines semdanger lir.

Kasa senden nung shilem agitsü asoshi China Tir, Xi Jinping-a Manila tonga aoba osang jangjaogo.

Tan APEC senden nung shishilembatsü aser Islamic State (IS) kiralongrartem anema raratsü onüktem tongtipangsüa benoktsü asoshi renema lir.

US lenisang, Obama-i tan Philippines semdangdang, Asia-Pacific tensa aser rongsenren jenjang tajungba kümdaktsütsü nükjidong nung Trans-Pacific Partnership (TPP) tezüngzüktep takok ngua agitsü alizüng ayuba osanga angazükogo.

Tan APEC senden nung shilem agiba sülen Association of Southeast Asian Nations (ASEAN) senden nunga shilem agitsü asoshi Obama-i tan hopta tatembanglen Malayasia semdangtsü sentong renema lir.