US Tir, Obama-i Turkey, Philippines & Malaysia semdangtsü

Washington, October 27 (Agencies): US Tir, Barack Obama-i taruba November ita Turkey semdanga idakji amentsü ayongba G20 Summit senden nung shilem agiba sülen Philippines aser Malaysia na semdanga alima lenirtem den senden balala amentsü sentong renemba osang ka White House-i tanü Mongolbar nü metetdaktsüogo.

Alima lenirtemi G20 senden nung multinational corporation-tem sorkar nem saru shitak magütsüba ajanga kümshi sorkar nem tejemba agi dollar sen billion 100 shi takoksa bener arutsübaren agientsü mapatong benoktsü sentong renema lir.

Aji oda, Google, Apple aser McDonalds nunger amala tentettemi ozüng alema meinyakaka, sorkar nem saru tajemba agütsüba maparen azüoktsü nükjidong nung alima lenirtemi onük 15 densemba mapatongji agizüka mapa küma inyakdaktsütsü terenemshiba agia lir.

“G20 senden nung shilem agidang ozü lenisang, Obama-i alima ajunga nung rongsenren jenjang liromedema rendaktsütsü tasa kar benoktsü sentong renema lir,” ta White House otongdar, Josh Earnest-i metetdaktsü.

“Ano, taruba November ita 14-22 nü tashi ozü lenisangi bendanglen semdanga senzüdang alima tali tatsükba akümba ajanga tsüngsang mupong balaka küma melenshibaren azüoktsü onüktem lenir balala den benoktsü sentong lir. Yamaji inyakba ajanga taküm küm tatembanglen Paris yimti nung amentsü ayongba Global Climate Change senden nung alima lenirtemi tezüngzüktep tajung agitettsü,” ta pai ashi.

Alima 3.6 degrees Fahrenheit den tatsükba mekümdaktsütsü tezüngzüktep agitsü nükjidong nung Paris yimti nung sendenji jatepba osang jangjaogo.

Obama-i Philippines nung ayongba Asia Pacific Economic Cooperation Summit aser Malaysia nung ayongba US-ASEAN & East Asia Summit na nunga shilem agitsü sentong renema lir ta Earnest-isa metetdaktsü.