US tsürtemi Rio Olympics nung shilem agitsü jenjang nguogo

Toronto, July 23 (Agencies): Tang Canada kübok Toronto nung tasayadak Continental Championships nung US’er tsür hockey team-i Canada madak semifinal asaya akokba sülen Rio 2016 Olympic Games nung shilem agitsü jenjang tanü Brehostibar nü nguogo.
Hockey World League Semi-Finals nung takok ngua shilem agiba sülen Rio Olympics nung shilem agitsü jenjang anguba Argentina teloki mezüngbuba semifinal asaya nung takok ngua final-i aiba osanga jangjaogo.
US-i tanü takok anguba sülen Korea, Britain, China, Germany, Netherlands, Australia aser Argentina nunger ensemba telok sülen anidaka Rio Olympics nung shilem agitsü jenjang nguteter tetsür hockey telok 8 buba akümer lir.
Rio Olympics nung shilem agitsü telok 3 tashi maneni shimtettsü anünga lir saka tang tasayadak Continental Championships taküm October ita tembanga asayaba sülen ang telok 3-ji jangjatettsü.