US & UK nati memenudang Islam anema inyaktsüla: Franklin Graham

New York, June 6 (Agencies): United Kingdom nung civilian tem anema kiralongraba mapa kanga bulua inyakba nung ajemdaker, British aser United States sorkartemi memenudang Islamic kiralongraba anema inyaktsüla, ta evangelist Franklin Graham-i ayongzükogo.
Taoba hopta London nung kiralongrartemi nisung 7 tepsetba aser 48 yirutsübaji Islamic State-i tenüng agiogo aser iba atema Franklin-i pa indang Facebook page nung tebilembatem metetdaktsü.
Pa ya Billy Graham’er jabaso lir aser Billy Graham Evangelistic Association nung tir inyaker.
“9/11 nungi ni America dang Islam indang tesayubatem nung lendong lir ta shiyonga arur. Islam amangertem dang tekong tamajungtem sayur aser parnok dang mamangertem tepsettsü aser yirutsütsü indang tesayubatem agütsür. Internet aser social media ajanga item tesayubatem tali awaa oa sayur aser iba jagi asenoki lendongtem ajurur” ta Franklin-i metetdaktsü.
“Aiben Islam indang tesayubatem ajanga lanurtem ajungmesor aser parnoki Islam indang tsüngrem tenüng nung nisung tepseter aser tashiyim agi tetsürtem raksatsür. Asenoki Honibar aonung London nung iba telangzüba nguogo. Parnoki nisung 7 tepset aser 48 yirutsü. Muslim nungertemi iba ya Allah atema ta shiogo. Ita asem tsüngda U.K nung Islamic kiralongraba asemben atalokogo” ta paisa ashi.
May 22, 2017 nü Manchester yimti nung Ariana Grande indang kenten sentong ka nung bomb pokdaktsüdang nisung 22 asü aser 119 yiru. Iba mapa ya Islamic State-i inyak ta tenüng agiba metetdaktsüogo.
Taküm March ita nunga Westminster, London nung kiralongraba mapa ka nung nisung 6 tepset aser 49 yirutsü. Westminster kiralongrar, Khalid Masood ji parnoki ajungmeso ta Islamic State-isa iba tatalokba atema tenüng agiogo.
“Islam nung lendong keta lir ta asübaji shitakba lir. Iba lendong ya kanga tulu lir. Iba atema asenoki tebilemtsü abentsüla aser Tsüngrem dang asen Tir, asen Congress aser Senate nem shisatsü agüjang aser linük atema kechi tim’ar inyakang ta sarasademjang. United States aser UK-i memenudang mejanga aliba nung saaker mapa inyakang ta ni sarasademer” ta Franklin-isa ayongzük.