USSC-i Kiphire Police shimba maparen aitsür

Kiphire, Jul 25 (TYO) : Kiphire DEF nung Superintendent of Police kübok constables, ministerial staff aser Grade-II employee-tem shimba yimya nung ochimashi alinungji ibaji magitsüsa katiang ta United Sangtam Students’ Conference (USSC)-i metetdaktsüogo.

USSC Executive Chairman Justin Khatomong-i sangdong ka nung ashiba agi, Eastern Naga Students’ Federation (ENSF) purtemi 1977 küm nungi parnok asoshi sorkar mapa nung 25 per cent job balaka shimteta yutsütsüla ta akanger, ajisüaka tatidang magi tim masülen nungi Nagaland kübok Eastern district-tem nung shimba jagi Nagaland Job reservation policy liaka aji magii Eastern purtem mezüngmeshiba mapa ka jungkai adoker asütsü ta paisa ashi.

Nagaland nung sorkar mapa nung shimba maparen ya tim mesüi inyakba ajanga karbo kecha tatidang magii shimer, iba jagi temsüa alirtem aika akoksadaktsür ta ENSF lenirisa ashi.

Iba department yagi sorkar inyakyim nung nisung tasen ka shimtsü asoshi  inyakyim nung  nübortemi temulung malemtsüsa inyakogo ta USSC-isa tejashiba ola ka metetdaktsü.

Anungji, Kiphire District aser Sangtam nungertemi angatetba ama inyaktsü asoshi tang tim mesüi shima alibatem ajakji ‘cancel’ asütsüla ta USSC-i takangba ka agüja lir.

Iba ama sorkar mapai aitsüba lenmangji temsüa alir ajak shilem shitak agitettsüsa Kiphire district atema ajaki meteta ‘advertisement’ yoktsüla. Iba amaji asünung dang asenok sensakertem jala jabasotema tadongokdak akatsü.