Utkal Express lendong atema Railways-i ketdangser 4 mapa nungi anentsü

Lucknow, August 20 (Agencies): Deobarnü Indian Railways-i ketdangser pezü mapa nungi anentsü aser ka tangaleni belenogo aser külen Uttar Pradesh Police-i Utkal Express lendong nung nisung 22 asü aser 200 tema yirua lir ta osang metetdaktsü.
Ketdangser pungui mapa shitak meinyak ta tai tonglokja Railways-i par pezü anentsüba den ka tangaleni belenba sülen, ano general manager ka aser Railway Board züngsem ka aser Divisional Railway Manager ka “sent on leave” ta sangdongogo.
Mapa nungi anentsürtem rongnung senior divisional engineer dena lir. Railway Board-isa Northern Railway General Manager RK Kulshreshtra, Railway Board Member Engineering Aditya Mittal aser Divisional Railway Manager Delhi RN Singh nungertem leave nung yutsüogo aser Northern Railway Chief Track Engineer mapa belenogo.
Honibarnü Uttar Pradesh nung train lendong atalokba sülen osang tejangja bushitepa arur ADG Law and Order, Anand Kumar-i iba lendong nung nisung 22 süogo aser 202 yirua lir, ta osang metetdaktsü.
“Lendong atalokba sülen ATS-i bushisüngdanga arudang, kiralongraba mapa inyakba kulibo kecha nguteta mali” ta paisa ashi.
Honibarnü Uttar Pradesh kübok Khatauli nung Puri-Haridwar-Kalinga Utkal Express train takdang 14 tashi lenmang nungi lungpeta tugu.
Train indang takdang ka lenmang anasa aliba ki ka nung tsüok aser idakji nisung aika asü. Iba lendong nung yirurtem sorkar aser nija mozüki balala nung anepaludar.
Yashi lendong atalokba sülen Union Railway Minister, Suresh Prabhu-i tasür kibong shia nem sen lakh 3.5, kanga mejungi yirua alir nem sen meyirjang 50 aser tera yirur nem sen meyirjang 25 teyari agütsütsü metetdaktsüogo.