Uttar Pradesh atema Congress-i Raj Babbar shim

New Delhi, July 12 (Agencies) : Sangküm Uttar Pradesh nung assembly elections atema Congress-i actor nungi yimsüsür akümsang Raj Babbar state unit tanishir inyaktsü shimogo.

Raj Babbar ya Congress atema otongdar ka aser Rajya Sabha nung Uttarakhand nungi MP ka lir. Pa ya taoba mapang Samajwadi Party nung züngsem ka liasü aser küm ishika tejaklen Congress nung aden.

2009 küm by election nung Raj Babar-i UP chief minister Akhilesh Yadav kinungtsü Dimple Yadav madak takok ngua liasü.

UP atema Congress leader in charge, Ghulam Nabi Azad-i Raj shimba osang metetdaktsü.

“Raj Babbar ya UP nung aso aser aben UP nungi Parliament züngsem ka liasü” ta tanü Azad-i ashi.

Congress-i UP assembly elections atema Priyanka Gandhi Vadra nem tongti mapa agütsütsü akok ta nisung aikati imlaa liasü saka ibaji matalok.

Arishi küm 44 tain, Priyanka Gandhi-i taoba election tem nung Rae Bareli aser Amethi nung dang nüboyimtsü. Iba constituency ana ya tetsü Congress president Sonia Gandhi aser tenu Rahul Gandhi na indang lir.

Sangküm Uttar Pradesh election ji telok ajak atema kanga tongtipang kechiyong iba ajanga 2019 national elections nung teyari angutsü.

Uttar Pradesh assembly elections atema Congress-i master election strategist Prashant Kishor teyari meshiogo. Prashant-i 2014 national election nung Prime Minister Narendra Modi atema aser yaküm Bihar assembly elections nung Nitish Kumar atema takok ngudaktsü ta züngshir.