Uttar Pradesh nung tiyazü ken o nung tai ajemdaker pastor 7 apu

Lucknow, December 8 (Agencies): India nung pastor tenet dak tangar temulung meyipdaktsüba ken o atema tai tongloktsüba sülen parnok küm aika tepudokdak ayutsü akok.
London nung amenoka aliba British Asian Christian Association-i ashiba agi, Uttar Pradesh state kübok pastor 7 ji Indian Penal Code nung Arrla 295A kübok aitsü aser iba jagi parnok küm asem tashi tepuokdak ayutsü akok.
Tesüiba ita ka shi pastor tem jagi Irauli Gurjar tesem nung sayutsüngiba mapa inyaktsü merang saka idakji aliba Hindu nungertemi parnok nokdang. Parnoki Hindu nunger tajemzükba tia nung alirtem Khristan yimsü agizükdaktsütsü merang ta tai tonglokja ken o benok.
Pastor Stanley Jacob-i ashiba agi, Mamta ta ser tetsür kati pa den külemi tanga pastor tem lar kidang sarasademtsü atema jaok. iba
Mamta aser la kinungbo Pradeep Singh na Khristan yimsü agizükba sülen tawa tuang iba yimtsüng nung alitsü atema aru.
Mamta tenu jia tawa tu Khristan yimsü agizük saka item ajak jagi Mamta’er kinungertem jashidaktsü.
Pastor temi lar ki semdanga sarasadem sentong agidang Khristan yimsü agizüknürtem lar kidangi aru aser idangji pastor temi osang tajung lemsatepba den Laishiba lema agütsü.
Ajisüaka, iba mapang Hindu nungertemi tejashi nung sentongji anendaktsü.
Pradeep Singh tebu tanubo Lal-i police dang iba osang sangoktsü aser police tonga aruba sülen pastor temji anir ao.
Sentong agiba arubatem nung Lal Singh maden saka pai pastor temi tanga yimsü sensamasütsü ta ken o benokba nung shia lir. Paisa police dang tashiyim agi tamangba yimsü melendaktsü ta ashi.
Pastor teneti bail nung chioktsü temelaba meshi saka yashi okadaki iba temepishibaji magizük.
“Pastor temi timtem ajangshibaji ni meteta lir. Kuli kecha melii parnok apuba atema kanga jashir. Yisu Khrista indang osang tajung tsübuba agi Hindu nungertemi tiyazü ken o adoka parnok aitsür” ta India nung BACA lead officer, Pastor Naresh-i osangbener dang ashi.
“Tangartem taküm aser tanüla kümzüktsü merangertem dak tiyazü nung tai tonglokja pudaktsür saka iba jagi parnok tamang ila mekümdaktsür” ta paisa shisem.
Taoba Hombarnü apuba pastor 7 ji- Kerala nungi Stanley Jacob, New Dehli nungi Pastor David, Odisha nungi Vijay Kuma, Mathura nungi Pastor Amit, Hathras nungi Summit Varghese, Hathras nungi Pastor Anita aser Rajasthan nungi Dinesh nungertem lir.
“Onoki akokba tashi pastor temji yaritsü. Ni parnok kibong kar denbo jembiogo aser ni parnok semdangtsü. Parnok indang legal fees atemaa yariteptsü. Ajisüaka, parnok kinungtsü aser tanurtemi anogoshia parnok osang yongya atar. Iba ya parnok atema mapang tamajung ka lir” ta Pastor Naresh-isa metetdaktsü.
BACA-i item pastor tem aser India o Pakistan nung reshikangshi ajuruba Khristantem yaritsü atema online donations agizüker.
“Khristmas atongtsü mapang parnok apuba ajanga kibongtem timtem tulu ajuruogo. Khristmas ya tepela mapang ka lir saka parnok kibongtem atemabo iba ya shisabulu aser tetsübu mapang ka lir” ta BACA Chairman, Wilson Chowdhry-ia ashi.
“India nung pastor ka inyaktsübaji mapa kanga tasak ka kümogo. Paul mapang reshikangshi ulura ajuruba ama tang India nung Khristantem reshikangshir” ta Naresh-isa shisem.