Uttar Pradesh nung tzümetsüng lendong nung nisung 16 süogo

Lucknow (Uttar Pradesh), Rongjui/September 03 (Agencies): Tang Uttar Pradesh nung tzünglu sashia aruba ajanga tzümetsüng lendong nung nisung 16 süogo; yashi Indian Air Force (IAF) sepaitemi Lalitpur aser Jhansi district na nung nisung 14 kümzük, ta tanü ketdangsertemi metetdaktsü.
Amungnü anepdang Lalitpur district kübok yimtsüng kasa nung nisüng trok kümzük aser Jhansi district nung angopur nisung ti Erech Dam anasa asetkong ka nungi kümzükogo, ta ketadangsertemi ashi.
Iba dak sendakba nung state Chief Minister, Yogi Adityanath-i IAF rescue team dang pelaba lemsatepa liasü.
Uttar Pradesh Relief Commissioner Sanjay Kumar-i, “Lalitpur district nungi nisung trokprong kümzükogo. IAF team-i mapa tajung inyakogo,” ta ashi.
Pai ashiba agi, “Jhansi district magistrate-i angopur nisung ti pronglaji IAF team kati kümzükogo ta metetdaktsüogo.”
Yashji India Meteorological Department (IMD)-i, tesüiba ghonda 24 tsüngda state kübok tesem aika nung tzünglu sashia aruogo ta metetdaktsü.
Haryana aser Uttar Pradesh aser Madhya Pradesh tesem aika nung tzünglu sashia aruogo, ta IMD-isa metetdaktsü.