Uttar Pradesh sorkari nütsüng tali arenba nokdangtsü atema inyaktsü

Lucknow, March 06 (Agencies): Uttar Pradesh nung sorkari nütsüng tali arenba nokdangtsü atema inyaktsü, aser item rongnung tanur ana dak tali aliba kibongtem nem sorkar welfare schemes magütsütsü.
Iba dak alia tanur ana dak tali aliba kibongtembo Panchayat elections nung metoktepdaktsütsü aser state services magütsütsü atema ketdangsertemi jembidar.
Uttar Pradesh nung nütsüng tali arenba nokdangtsü maparen dak sendakba nung UP Health Minister, Jai Pratap Singh-i, “State balala nung nütsüng tali arenba nokdangtsü atema inyakba inyakyimtem onoki shisadangdar aser item rongnung tajungtiba inyakyimtemji nütsüng timtiba aliba ozü state nunga benoka inyaktsü,” ta metetdaktsü.
Minister-isa, “Mongintemi policy ka draft südar. UP indang population policy tesüsabuba reprangshibaji 2000 küm liasü,” ta metetdaktsü.
Mongintem tentet nung züngsem, Dr Badri Vishal-i, north tsütsü aliba state tem nung nütsüng tali arenba nokdangtsü atema inyakdar aser south tsütsü aliba state tem nungbo nütsüng tali arenba nokdangtetogo, ta metetdaktsü.
Paisa, “State aika, talisa Rajasthan aser Madhya Pradesh ya nütsüng sasep nungbo onok (UP) dang tilaba, saka parnoki kibong nung tanur aika masotsü atema ajungshir. State anaprongla nungji tanur ana dak tali aliba kibongtemi election nung metokteptettsü. Onokia iba ozüng ya benshitsü atema benokogo,” ta metetdaktsü.
Osang angazükba agi, UP sorkari nütsüng tali arenba nokdangtsü atema tongti mera ana agia inyaktsü, aser itemji- mezüngbuba nung tanur ana dak tali aliba kibongtem nem sorkar welfare scheme magütsütsü aser tanabuba nung tanur ana dak tali aliba kibongtem nem state services magütsütsü.
Tang Uttar Pradesh nung nütsüng crore 22 dak tema lir.
Yaküm Independence Day sentong nung jembidang Ato kilonser, Narendra Modi-ia linük nung nütsüng tali arenba tebilemtsü süoka jembia liasü.
February 19, 2020 nü Uttar Pradesh Chief Minister, Yogi Adityanath-ia, linük nung mapa manguba tebilemtsü tuluba akümba kuliji nütsüng tali arenba ajanga lir, ta shiogo.