Uttar Pradesh sorkari tensa tamajungba kümdaktsür: Rahul

New Delhi, May 27 (Agencies): Tanü Congress tatong Tir, Rahul Gandhi-i Uttar Pradesh, Saharanpur semdangtsü apusoa liasü, saka iba jila nung ketdangsertemi pa nokangba sülen pai Uttar Pradesh nung BJP sorkari tensa tamajungba kümdaktsür, ta aitsü.
Yamuna ayong apudong nung osangbenertem den jembidang Congress lenir Rahul-i, Shabbirpur yim atongtsü lia pa amenba gari police-i sota liasü, ta metetdaktsü.
“Tang tensa apir ketdangsertemi kü dang iba tesem toktsür aotsü asüngdangogo, anungji ni meyipa aotsü. Kodang tensa süngjemdir yim semdangtsü atema kü nem temelaba agütsütsü ta parnoki shiogo,” ta paisa metetdaktsü.
Tang Centre sorkari Uttar Pradesh, Saharanpur-i police 400 yoka lir.
Rahul den Congress lenir tain ana, Gulam Nabi Azad aser Raj Babbar nata liasü.
Rahul-isa, Yogi Adityanath-i aniba BJP sorkari state nung tsüzüng-ozüng tensa tamajungba kümdaktsür, ta aitsü.
“UP nung sorkari tensa mazüokteti tamakok nguogo. Linük nung tashi malir ajak tsübuteper. Iba ama yimya nung linük yimsü masütsüüla,” ta paisa ashi.
Ketdangsertemi Dalit nunger anema inyaker, ta Rahul-isa aitsü.
Tang rara adoka aliba Saharanpur nung Dalit nung kibong 180 tashi Buddhist tamangba yimsü dangi meyipogo.
“UP nung BJP sorkari Dalit nunger timtemdaktsüner, aser parnok anema nokdakertem nokdangtsü atema parnoki (BJP) tashi ajak amshia inyaker,” ta paisa aitsü.