Uttarakhand Assembly floor test nung Rawat-i takok nguogo

Dehradun, May 11 (Agencies): Uttarakhand Assembly floor test nung Congress-i takok anguba sülen Bodhbarnü Centre sorkari Supreme Court (SC) dang parnoki state nung Tir yimsüsüba agientsü, ta metetdaktsüogo.
Tanü Centre sorkar tenüng nung Attorney General, Mukul Rohatgi-i SC dang taoba chief minister aser Congress lenir, Harish Rawat-i assembly nung majority takok nguogo aser Centre-i state nung Tir yimsüsüba agientsü ta metetdaktsüba sülen SC-i, Harish Rawat-i Uttarakhand Chief Minister menden atsüngtsü akok, ta ashi.
Uttarakhand floor test nung Harish Rawat-i züngsem 61 nungi vote 33 angu.
Mongolbarnü MLA 33-i Rawat nem vote agütsü aser Bharatiya Janata Party (BJP)-i vote 28 dang angu. Menden 72 aliba assembly nung MLA tashi 62 tashi ajema aluogo.
Molung masüba Congress MLA 9 nem vote  magütsüdaktsü iba den külemi Assembly Speaker-ia vote magütsü. SC-i ketdangsüa vote agütsütepba sülen parnoki iba osangji Bodhbarnü sangdongtsü ta ashi, ajisüaka minute ishika tsüngda Congress party bo takok nguogo ta pelatepa liasü.
Tanü osangbenertem den jembidang Rawat-i, Centre sorkar dang pa tejashiba mali aser state terenlok atema state-i Centre teyari nüngdaktsü, ta ashi.
Rawat-i menürema, “Onoki Centre sorkar teyari nüngdaker. Ozü state ya tilaka dang saka onok mangdangji tulu,” ta ashi.
Majority sayutsü atema Supreme Court-i temelaba agütsüba ajanga nüburtemi India nunger judiciary aser temzüng nung tamang taliba kateter, ta paisa shisem.