Uttarakhand CM Trivendra Singh Rawat-i tenangzükba agiogo

New Delhi, March 18 (Agencies) : Taoba Uttarakhand BJP President, Trivendra Singh Rawat-i tanü Uttarakhand Chief Minister inyaktsü atema tenangzükba agiogo.
Iba sentong nung Prime Minister Narendra Modi aser BJP president Amit Shah nati anir BJP tongti lennir aika aden aser Governor KK Paul-i Rawat nem tenangzükba agidaktsü.
Tawa Uttarakhand Assembly elections nung BJP-i menden 70 nungi 57 nung takok ngua liasü.
Tanü Rawat den külemi Satpal Maharaj, Harak Singh Rawat, Madan Kaushik, Arvind Pandey, Subodh Uniyal, Yashpal Arya aser Prakash Pant nungertemi tenangzükba agiogo aser angazükba agi parnok Cabinet minister shimtsü.
Rawat-i Doiwala constituency nungi toktep aser iba menden nungi pai vote 24,000 den tema agi Congress candidate Hira Singh Bisht madak takok angu. 2002 nungi Rawat-i asembenren tashi iba menden nungi takok nguyonga arur.
“Uttarakhand nung alirtemi parnok aintsü atema maongkatem aginür. Anungji, onoki tenem aser lenden ajungalen terenlok bener arutsü atema alizüng yur mapa inyaktsü” ta Rawat-i ashi.
Rawat ya sorkar ketdangsübaren nung aika ajangshia aruba nisung ka lir. Taoba mapang B C Khanduri aser Ramesh Pokhriyal Nishank nati aniba BJP sorkartem nung pa minister inyaka liasü.
Arishi küm 57 tain Rawat ya Uttarakhand nung BJP chief minister pungububa asütsü. 2000 küm Uttar Pradesh nungi state balala razüka aoba sülen BJP-i mezüng sorkar aküm aser iba mapang Nityanand Swami-i Chief Minister inyak. Iba sülen March 2001 nungi BJP lennir B.S. Koshyari-i Swami melenzük.
Rawat ya Thakur nunger lennir ka lir aser pa RSS nung tera yanga aliba ajanga Uttarakhand chief minister inyaktsü atema nübo tongtipangtem rongnung pa dena liasü. 1983 nungi 2002 tashi pa RSS pracharak ka liasü aser paisa Sangh nung menden balala nung mapa inyakogo.
Rawat arishi küm 19 asüdang RSS nung aden aser iba sülen BJP nung züngsem aküm.