Uttarakhand floor test atema Cong, BJP-i tetuyuba agütsür

New Delhi, May 07 (Agencies): May 10 nü Uttarakhand Assembly nung floor test agitsü lia Congress aser BJP-i par MLA tem dang temetettsü balala metetdaktsüdar.
Floor test atema party MLA tem dangi temetettsü metetdaktsüba maparen tenzükogo, ta Honibarnü Congress Chief Whip aser taoba Parliamentary Affairs Minister, Indira Hridayesh-i ashi.
MLA tem dang e-mail, SMS aser shidi ajanga May 10 nü Uttarakhand Assembly-i arua vote agütsütsü metetdaktsüogo. “Züngsemtemi Congress pusemer aser onoki takok angutsü,” ta lai ashi.
Taoba mapang minister-isa, floor test magidang party MLA senden ka ayonga akatsü, ajisüaka taoba Chief Minister Harish Rawat den tongtepratepba sülenang senden amentsü mapangji lemtettsü, ta ashi.
Ano külen BJP chief whip, Madan Kaushik-ia, party MLA tem nem temetettsü balala agütsütsü atema renemdar aser item temetettsüji asüng yangi senden amendang party MLA shia nem agütsütsü, ta ashi.
Yashi Supreme Court-i May 10 nü state Assembly nung nübo sayuteptsü atema tuyuogo.
Tang mulung masüba Congress MLA 9 aser BJP MLA ka anenja lir. State assembly nung tang BJP MLA 28, Congress 27, BSP 2, independent MLAs 3 aser Uttarakhand Kranti Dal (P) MLA ka lir, ajisüaka Progressive Democratic Front (PDF) MLA 6-i Congress pusemer.