Uttarakhand HC-i March 31 nü ‘floor test’ agitsü tuyuogo

Nainital, March 29 (Agencies): Deobarnü Centre-i Uttarakhand nung Tir yimsüsüba benoka liasü ajisüaka Mongolbarnü Uttarakhand High Court (HC)-i March 31 nü state assembly nung MLA nübo tashi sayuteptsü tuyuogo.

Party anema noktaker Congress MLA 9 densema MLA ajaki nübo sayutepba nung shilem agitettsü, ajisüaka anenja aliba MLA tem indang vote jibo balaka bendangtsü.

Tanü agi ananübuba ken o angadangba sülen Supreme Court lawyer aser Congress lenir, Abhishek Manu Singhvi-i osangbenertem dang, “Centre-i Tir yimsüsüba benokba sülen chief minister, Harish Rawat-i ibaji anema temepishiba ka zülua liasü,” ta metetdaktsü.

Hombarnü Harish Rawat-i ozüng inyakyim ajanga Tir yimsüsüba anema temepishiba ka agütsü aser ibaji agientsü atema takhangba agüja liasü.

Harish-isa, Modi’er sorkari agiba telemtetbaji tashi alia amshiba aser amabangyima inyakba lir, ta aitsü.

State sorkar tashi nung aliba party, Congress nung MLA kari party anema apusoba ajanga state nung yimtenren tensa raksaogo ta shia Deobarnü Centre-i state nung Tir yimsüsüba benoka liasü.