Uttarakhand HC tetuyuba anema Centre-i temepishiba benok

Dehradun, March 30 (Agencies): Centre sorkari Uttarakhand nung Tir yimsüsüba benokba sülen yashi Uttarakhand High Court (HC)-i March 31 nü Uttarakhand assembly nung MLA tashi sayuteptsü atema tetuyuba agütsüba anema tanü Centre-i temepishiba ka benok.

Centre sorkar tenüng nung Attorney General, Mukul Rohatgi-i Chief Justice K M Joseph aser Justice V K Bisht nati akümba High Court division bench nem temepishibaji agütsü.

Iba temepishiba nung, Tir yimsüsüba benokba ajanga House anenja aliba mapang ka nung state assembly nung ‘floor test’ agitettsü akok asü, ta asüngdanga lir.

State nung Tir yimsüsüba benokba anema taoba state Chief minister, Harish Rawat-i temepishiba ka agütsü, aser iba ken oji anogo ana angadangba sülen yashi single judge bench, Justice U C Dhyani-i March 31 nü state Assembly nung ‘floor test’ agitsü tetuyuba agütsüba den külemi iba mapang nungji Congress nung anenja aliba MLA 9 nema vote agütsütsü temelaba agütsü.

Ajisüaka tesülen aruba osang ka ajanga ashiba agi, yashi HC-i tetuyuba agütsübaji thinena atatsü.