Uttarakhand nung acid agi amakertem nem pension agütsütsü

Aenjeti/January 13, 2020 (Agencies): Uttarakhand sorkari acid agi yirutsür jenbortem nem state nung pension agütsütsü sangdongba sülen Film yanglur Meghna Gulzar-i ashiba agi, iba film nükjidong atalokogo. Meghna Gulzar-i Chhapaak film direct süa liasü.
Deobarnü lai Twitter ajanga news headline ka lemsatep kong “‘Chhapaak’ sayaba sülen Uttarakhand sorkari state nung acid agi amakertem nem pension agütsütsü sangdonger,” ta shia lir. Iba den lai “PURPOSE” ta zülutsü.
Honibarnü newindianexpress.com sangdong ka ajanga ashiba agi, Uttarkhand nung acid agi amakba nungi jenbor alirtem parnok 10-11 shi lir.
State Women and Child Welfare Minister Rekha Arya-i iba scheme indang sangdongba mapang, sorkari pension scheme ka tenzüktsü asoshi sentong lir, kong acid agi amakba nungi jenbor alirtem nem ita shia sen 5000 nungu 6000 tsüngdang agütsütsü, ajita asünungdang parnok lokti nung jenjang ka keter litettsü, ta ashi.
“Onoki iba scheme ya agizüka mapang küma inyakyonga aotsü atema cabinet nung benoktsü. Tasütait tetsürtem parnok nükjidong tonga liyonga odaktsütsü asoshi nongita yaritsü atema iba sentong benok,” ta Arya-i ashi.
Chhapaak nung Deepika Padukone aser Vikrant Massey nati tongti shilem agir, koba Laxmi Agarwal indang taküm otsü nung ajemdaker yanglyogo. Iba film ya January 10 nü sayaogo. Iba film sayaba atema Puducherry, Madhya Pradesh, Chhattisgarh aser Rajasthan nung saru kecha magitsü sangdongogo.
Ajisüaka Deepika-i JNU semdanga mepetmesü nung aliba kaketshir aser tesayurtem den ajurutepba sülen aikati iba film merprangtsü asoshi nokdakogo.