Uttarakhand nung Congress MLA 9 BJP nung denogo

Dehradun, May 19 (Agencies): Uttrakhand nung taoba mapang Chief Minister, Vijay Bahuguna densema melung masüba Congress MLA teku prongla BJP den denogo; tamalen parnok ya anti-defection law kübok assembly nungi anentsür liasü aser tanü parnok ajak BJP den aden.
Bahuguna densema MLA tekui BJP bangdak lenirtem ajurua liasü.
Uttarakhand BJP Tir, Ajay Bhatt-i, “Congress nung melung masür MLA ajaki Uttrakhand nung Harish Rawat anema nokdaka liasü aser tanü parnok telatetba kecha makai BJP nung denogo,” ta ashi.
Paisa, ano Congress nung melung masür MLA Rekha Arya, shibai floor test mapang Rawat anema vote agütsü, laa tanü BJP nung denogo, ta ashi.
BJP nung adenbaji nija tajangzük atema masü saka state ajungtsü atema lir ta shia  Bahuguna-i, state ajungtsü atema parnoki maneni nokdaktsü, ta ashi.
Bahuguna-i, “Onoki state assembly anentsü aser election agishitsü atema akhanger, kechiyong Harish Rawat’er sorkar tashi nung alitsü temeten makai kümogo aser nüburtemia tamang makateter,” ta ashi.
Ato kilonser, Narendra Modi tenüngsanga Bahuguna-i, “Pa ya tenendak lenir ka lir aser junga yimsüsüba den terenlok atema masetshii inyaker ka lir. onoki pa lenisüba nung tamang akar aser tesüiba küm ana pai yimsüsüba nung melung asür,” ta ashi.
“Onoki BJP Tir, Amit Shah ajurua ochimashi Congress sorkar atsüngdoktsü aser Uttrakhand nung yimtenren menena aliba asüngtettsü atema raraba nung adentsü atema onok dang melaba atema pa dang pelaba metetdaktsüogo,” ta ashi.
BJP nung adener rongnung taoba minister Harak Singh Rawat, Bahuguna, Amruta Rawat, Shailendra Mohan, Kunwar Pranav Singh, Subodh Uniyal, Pradeep Batra, Shaila Rani Rawat aser Umesh Sharma nunger lir.
Bahuguna-i, “Tekaraba nung assembly anentsütsüla, parnoki majority ngutet. House züngsem 71 alibaji 59 tashi ajema alutsü, kechiyong ano MLA ana anentsütsüsa lir. Anungji assembly anenja election agishitsü atema tuyutsüla ta ni bilemer,” ta ashi.