Uttarakhand nung Tir yimsüsüba benokogo

New Delhi, March 27 (Agencies): Congress-i yimsüsüba state, Uttarakhand nung party nung MLA kari party anema apusoba ajanga yimtenren anokshiba sülen  Deobarnü Centre sorkari state nung Tir yimsüsüba benokogo.
State Chief minister, Harish Rawat dang assembly nung majority sayutsü metetdaktsüba anogo atongtsü anogo ka dang lia Centre-i iba telemtetba agi.
Linük Temzüng nung Arrla 356 kübok Tir, Pranab Mukherjee-i Rawat-i aniba sorkar anentsütsü atema sign asüba sülen Union cabinet-i benokba nung ajemdaker Uttarakhand legislative assembly anenja atar, ta osang ajanga metetdaktsü.
Yasüng (Honibar aonung) linük yimtiba Delhi nung Ato kilonser, Narendra Modi lenisüba nung rongdak cabinet senden ka mena liasü.
State Angh, Krishna Kant Paul-i state yimtenren raksatsüsa lir aser Hombar nü state legislative assembly nung tashi sayutepdang rongrong tulu adoktsü akok ta yokba osangtem senden nung lemtepa liasü.
State nung Tir yimsüsüba benokba sülen osangbenertem den jembidang Union finance minister, Arun Jaitley-i, “tamendakdak tejangja aser kanga tongtibang nung ajemdaker Union cabinet-i iba telemtetba agi,” ta metetdaktsü.
Jaitley-isa, “Linük Temzüng Arrla 356 benoktsü atema iba dak alaka tatishitsü tajungba mali. Tesüiba anogo tuku tashi anogoshia Temzüng nung aliba ozüngtem tepseter. Ibaji tapet dang masü saka majority samar aliba iba ama ozüng alema inyakba sorkarji Uttarakhand nung malitsü atema akhangba mapangi sempet,” ta ashi.
Ano külen Rawat-i, Tir yimsüsüba benoktsü atema telemtetba agibaji Centre sorkari state nung Congress sorkar atsüngtoktsü atema jilia yangluba sentong tamajung ka lir, ta ashi.
Congress Party-ia centre-i agiba telemtetba aija, “iba ya democracy tepsetba lir” ta ashi.
Congress party otongdar tongti, Randeep Surjewala-i, “Arunachal (Pradesh) sülen, anüngdang jakdaka democracy tepsetogo, Temzüng aitsüogo,” ta ashi.
Paisa, BJP-i state nung sorkar atsüngdoktsü atema sen tashi aser tashiyim amshi, ta aitsü.
Ano Delhi nung osangbenertem dang Congress lenir aser taoba mapang law minister, Kapil Sibal-ia, “India nung okadaktem lir ta dang shiner, onoki high court dangi aotsü,” ta ashi.
Deobarnü Uttarakjand Speaker, Govind Singh Kunjwal-i taoba chief minister Vijay Bahuguna densema party anema noktaker Congress MLA 9 anentsü.
Bahuguna-i, “Tir yimsüsübaji mapang talangka malitsü aser kobi melii election tasen agishitsü ni imlar,” ta ashi.