Uttarakhand sorkari school tem anepalutsüla mesüra ‘Financial Emergency’ sangdongtsü: HC

Dehradun, July 2 (Agencies): Senotsü peria maliba ajanga Uttarakhand nung aliba sorkar school tem nung tang nüngdakbatem magütsüteter ta asünungbo state nung ‘financial emergency’ sangdongtsü ta High Court-i metetdaktsü.
Iba ya BJP-i aniba Uttarakhand sorkar atema maaksü ka lir.
“Onoki state sorkar dang Linük Temzüng nung Arrla 360 bilemtetdaktsür. Onoki iba dak talila kecha mashitsü, kechiyong iba ajanga yimten mapa tsütsü timtem ajurutsü akok” ta Justice Alok Singh aser Justice Rajiv Sharma nati metetdaktsü.
Arrla 360 kübok Tir-i state ka nung senotsü timtem nung ajemdaker ‘financial emergency’ sangdongtsü akok. State sorkari aiben senotsü peria maliba ajanga sorkar school tem nung tang nüngdakba- desks, benches, blackboard, tzü aser metsümeshidak amala magütsüteter ta ashiba agi, High Court bench-i iba osang metetdakja liasü.
Arrla 360 indang talila jembira state nung tang aliba sorkar atema timtem ajurutsü ta HC bench-isa metetdaktsü. “State ketdangsertemi parnok jangratemtsü atema endokba senotsü ajemtsüla aser ibaji teküpoktiba jenjang nung education system ajungkettsü atema amshitsüla” ta bench-i ashi.
High Court-i Trivendra Singh Rawat’er sorkar nem ita trok tsüngda, sorkar school ajak nung tang nüngdakbatem agütsütsü atema mapang latettsüogo. Tang nüngdakbatem rongnung- benches, desks, blackboards, tzü tajemtsü aser tetsür o tebur atema metsümeshidak balala yanglutsütsü dena lir.
Iba tetuyuba ama mapa meinyakra, Education Department nung Principal Secretary, Secretary, Deputy Secretary aser Director tem ajak dena ‘gazetted officers’ nem January, 2018 nungi itasen magütsütsü, ta High Court-isa ashi.
HC-i November 2016 nung sorkar school tem nung tang nüngdakbatem agütsütsü atema obendang ka agütsü aser iba nung senotsü maliba ajanga school tem nem ‘infrastructural facilities’ magütsüteter ta sorkari ashitsü makok aser temzüng nung aliba ama mapa inyaktsüla, ta HC bench-isa shisem.
Hopta ka tejakdang High Court-isa state sorkar ketdangsertem dang luxury cars aser furniture malitsü atema tetuyuba ka agütsü, saka Uttarakhand state Advocate General-i nangzükba nung ajemdaker iba tetuyubaji agienogo.
Advocate General-i nangzükba nung ajemdaker High Court-i sorkar ketdangsertem dang ‘luxury cars’ alitsü akok saka ibaji state Chief Secretary nungi temelaba meshiba sülen ang alitettsü ta tetuyuba agütsü.
Iba den külemi Chief Secretary-i Uttarakhand nung ‘luxury cars’ aliba indang osang tejangja bendentsü atema High Court-isa tetuyuba agütsü.
“Okadaki education jenjang kanga mejungi akümba atema süoki ia bilemtsür aser ibaji talisa sorkar school tem nung lir. Ketdangsertem aser sorkar school nung tesayurtemia parnok chinurtem nija school tem nungang züngdaktsür. Iba inyakyim ya azüoktsü atema tang nüngdakba infrastructure agütsütsüla” ta HC-isa metetdaktsü.
Parnokisa public sector aser tamangba yimsü teloktem dang state sorkar school tem nung infrastructure ajungketba mapa nung yariteptsü atema mepishia metetdaktsü.