Uttarakhand-Uttar Pradesh nung yi nung mim jemsemer 70 süogo

Haridwar/Saharanpur, February 09 (Agencies): Uttarakhand aser Uttar Pradesh na arrtsülen aliba district, Haridwar nung yi nung mim jemsemer nisung 70 süogo, ta tanü ketdangsertemi metetdaktsü.
Ano tasümang 11 tendangba ajanga parnokjia yi nung mim jemsemba agi asü tanga kuli agi asüar jangjatsü.
Asürtem rongnung nisung 24 bo Balupur aser Uttarakhand kübok Haridwar district nung kidanger yimtsüngtem nung liasü, ta state additional director general (Law and Order), Ashok Kumar-i metetdaktsü.
Ano Balupur nung yi nung miim jemsemer Uttar Pradesh kübok Saharanpur district-i meyipa arur nisung 46 shi asü.
UP ketdangsertemi ashiba agi, Saharanpur district kija nunga nisung 35 asü. Ano Saharanpur nungi medical treatment atema Meerut-i aoer nisung 11 yangji aliba hospital nung asü.
Uttarakhand nung tang nisung 20 shi treatment agidar.
Uttar Pradesh police-i ashiba agi, Saharanpur district nung alir kati kasa yiji bener arua ayoktsü atema Uttarakhand nungi alizüka bener aru.
Saharanpur district magistrate, Alok Pandey-i ashiba agi, Nangal aser temeket nung aliba yimtsüngtem nung alirtem aika Balupur nungi meyipa aruba sülen shirang tenzüka liasü.
Iba dak sendakba nung UP Chief Minister, Yogi Adityanath-i Kushinagar aser Saharanpur na nung district excise ketdangsertem nem temerenshi agutsütsü tuyuogo.
Uttarakhand nunga excise department nung inyaker 13 aser police pezü mapa nungi anenja lir aser UP nunga police 10 mapa nungi anenja lir.