Uvena Fernandes FIFA World Cup atema India tsür mezüng referee kümogo

New Delhi, July 29 (Agencies) : Taküm September 30 nungi October 21 nü tashi Jordan nung asayatsü ayongba FIFA U-17 tetsür World Cup nung India tsür Uvena Fernandes referee asütsü shimogo.
Asian Games, Incheon 2014 nung asaya 3 nung referee asüla arishi küm 34 tain, Uvena ya India nungi referee tanabuba lir. La jakdang 2012 FIFA World Cup nung India nungi K Shankar referee asütsü shima liasü.
“Ibai ni asoshi pongmang ka asangsang nung ataloker mesüka lir. Kü nem maongka tulu agüja  FIFA World Cup nung referee asütsü shimba atema kanga pelar,” ta Uvena-i la shimba sülen All India Football Federation website ajanga ashi.
“Jordan nung asayatsü ayongba U-17 World Cup asayamong nung ketdang asütsü atema ni shimba ya ni mamangteter. Iba ni atema dang masü saka tetsür football aser tetsür referee-tem ajungketba mapa ka lir,” ta lai ashi.
Uvena ya football asayar mongin ka lir aser lai 2003 AFC Asian Women’s Championship nung India tenüng nung asayaba sülen referee mapa shimtet. Iba sülen, Indian Air Force-i ayonga,  India nung kanga dang nüngtugu süa asayaba asayamong, Subroto Cup nunga la referee inyak.
La 2014 küm Incheon nung referee asüba sülen Uvena nem FIFA badge agütsü. Iba badge agizükba sülen lai international asayamong balala nung referee asütsü temeten angu.