Uzbekistan-i tepuokdak küm 21 puoka ayusang, Murod Juraev chiokogo

Bishkek, November 13 (Agencies): Uzbekistan sorkari par tepuokdak küm 21 tashi puoka ayuba sülen yimtenren ken o nung ajemdaker merenshir ka chiokogo.

Alima ajunga nung yimtenren ken o nung ajemdaker tepuokdak mapang talangba puoka ayur rong nung densemsang, Murod Juraev yashi Brehostibar nü chiok ta alima jenjang nung nübur temeten asoshi nokdakba tongti teloktemi tanü osang jangjashitsü.

Ajisüaka, Asia tiyongtsülen tentetba Uzbekistan sorkari Juraev chiokba osangji shitak mesüra olulu ta metetdakja tanü tashi osang jangjashija mali.

“Juraev tepuokdak nungi yashi, Brehostibar nü chiokba sülen pa par ki tonga oa par kibong den ajurutepogo,” ta Association for Human Rights in Central Asia (AHRCA) lenisang, Nadezhda Ataeva-i tanü osang jangjashitsü.

Tan tepuokdak nungi chioksang, Juraev ya tepuokdak puoka ayuba jakdang pa Uzbekistan parliament züngsem ka liasü.

Juraev ya par linük anülulentiptsütsü tentetba jila ka indang mayor aliba den külemi, sorkar opposition telok nunga tongti züngsem ka aliba osang jangjaogo.

Ano külen, Uzbekistan sorkari Juraev chiokba atema pelaba olen ka US State Department-ia tanü metetdaktsüogo.