V K Sasikala anema maneni raratsü: O Panneerselvam

Chennai, February 16 (Agencies): Brihostibarnü taoba Tamil Nadu Chief Minister, O Panneersevlam-i, J Jayalalitha yimsüsüba meyipa maru tashi pai AIADMK General Secretary, V K Sasikala aser lar kibong anema maneni raratsü, ta metetdaktsü.
Tanü pai, “Ano kibong ka kija keti party aser sorkar aoba nokdangtsü atema asenok longjemdi. Asenoki ano nüburtem sorkar ka tentetdi, ibaji masü tashi rara manentsü,” ta metetdaktsü.
Sorkar tasen akumtsü atema state Angh, Ch Vidyasagar Rao-i Sasikala-i melung lemtetsang aser AIADMK Legislature Party Lenir, Edappadi K Palaniswami jaokba sülen Paneerselvam-i, “Puratchi Thalaivi Amma (Jayalalithaa) yimsüsüba tanaben meshilang tashi onoki maneni raratsü,” ta ashi.
Pa den taoba state minister, K P Munusamy densema party lenirtem liasü, aser pai pa pusemertem aser nüburtem dang pelaba lemsatep.
Jayalalithaa taküm alidang lai Panneerselvam nem chief minister menden anaben tashi agüja liasü aser tanü pai, “Amma pusemertem teyari agia asenoki iba takok angutsü,” ta metetdaktsü.
Tesülen sangdong ka ajanga pai, “AIADMK ya kibong ka (Sasikala) meyong makümtsü atema onoki rara tenzük,” ta ashi.
Iba tongbang raradang nübur aser party züngsem aikati pa nungita yariogo ta shia pai, “Sorkar ka akumba tamendakdakji, resort ka nung kangshia MLA tem pudena ayuba ajanga akumba agi nüburtem jashir,” ta ashi.
Iba ama yimsüsüba ka amenokbaji nüburtem aser party tangatetba anema akumba lir, ta paisa aitsü.
Sasikala-i Tamil Nadu Chief Minsiter menden aginüa liasü, ajisüaka pei dak mapet rongsen jenti bendenba ken o nung yakünü Supreme Court-i la aitsüba sülen anogo ka lir yashi la jail nung puokogo.