Vadodara dang nungibo Varanasi shimmer: Modi

Varanasi, March 05 (Agencies): Deobarnü Ato kilonser, Narendra Modi-i, ‘ni Vadodara dang nungibo Varanasi yimti ang shimmer, kechiyong ni akhidang tekülem ki jila ya asentenshitsüner,’ ta metetdaktsü.
Uttar Pradesh assembly election shilem tatembangbuba atema nüboyimba sentong ka nung Modi-i, “Kü jila Vadodara aser Varanasi na nungi ni Lok Sabha election nung takok angu. Ni Varanasi shimmer kechiyong ni alima nung yimti tejentiba akhümket asentenshitsüner,” ta ashi.
Tanü Varanasi nung Ato kilonseri Election Commission dang nungi temelaba magi roadshow ayonga akaba anema Congress-i Modi anema FIR benoktsü takhangba agutsüdar, aser iba dak sentakba nung Modi-i, Lok Sabha election mapang pa BJP Ato kilonser candidate asüdanga pa nem temelaba magütsü, ta ashi.
Varanasi dang ya Kashi taka ajar, aser Modi-i, “Ni US semdangba mapang ni Boston-a semdang aser kü dang, par yimti nung lenmang ka dang Kashi ta ajar aser yangji alirtemi tesayuba mapa nung alirtem dang ‘guru’ ta ajar,” ta metetdaktsü.
Modi-isa par sorkari terenlok mapa balala inyaka alibatem metetdaktsüba den külemi pai Samajawadi Party Tir aser state Chief Minister, Akhilesh Yadav-a aitsü.
Akhilesh-i ni nangzükbatem nung mamanger, ta pai ashi.
“Tangbo state nung BJP-i sorkar akumtsü, aser ibaji atangji,” ta pai ashi.
Uttar Pradesh assembly election shilem tenetbuba March 8 nü agitsü aser tanga state tem den külemi March 11, 2017 nü vote zünga osang sangdongtsü.