Vajpayee-a Hindu liasü, saka paibo linük tama südaktsü: Faleiro

Panaji (Goa), October 30 (Agencies): Tang linük nung tamangba lokti tsüngda tesempatep aser mepetmesü aliba dak sentakba nung Hokolbar nü taoba mapang Rajya Sabha züngsem aser Union Minister, Eduardo Faleiro-i, “Ato kilonser Narendra Modi ama taoba mapang Ato kilonser Atal Bihari Vajpayee-a Hindu nationalist ka liasü, ajisüaka paibo teti linük tama südaktsü,” ta ashi.

Senior Congress lenir Faleiro-isa nashi tepsetba nokdangba ya tim masü, ta ashi.

“Centre nung NDA sorkar kübok aser state aika nung talitabong bilema oa inyakertemi parnok tangatetbaji benoker aser ibaji ajanga tamangba yimsü lokti balala aser kin kidong nung telemsa adokdaktsür,” ta Faleiro-i osangbenertem dang ashi.

Ponguben tashi Lok Sabha züngsem Faleiro-isa, “Godhra rara (Gujarat rara) adokba sülen Vajpayee den külemi ni Gujarat semdangba mapang taoba Ato kilonser Vajpayee-i, iba tatalokbaji kanga taochi maket aser nisung meimchiri inyakbabo memesük ta pai jembia liasü,” ta ashi.

Tawa linük nung nashi shi nokdangba aser kaket ken o zülur, sangro zülur aser shisashirtemi Sahitya Akademi aser Padma awards meyipa agütsüba dak sentakba nung Faleiro-i, “Tang linük nung tamangba lokti tsüngda mepetmesü aser rara züindagi,” ta ashi.

Nashi tepsetba nokdangba dak sentakba nung taoba Union minister of state for External Affairs Faleiro-i, “Hindu yimsü kanga ajang ajanga amanger Mahatma Gandhi-ia nashi tepsetba nokdangtsü memelungi liasü,” ta ashi.