Vajpayee arongba aut

Tang Nagaland nung BJP lenirtemi taoba ato kilonser asür Atal Bihari Vajpayee tasümang arongba aut Nagaland nunga ayong ka nung enoktsütsü asoshi Delhi nungi bener aruba ajanga nübortem rongnung ken o kanga buludagi. Atangji, Naga nunger tamangertemi mamangba pur ka arongba aut Nagaland nung ayong ka nung enoktsütsü bener arubaji Naga nunger asoshibo yimsü aser inyakyim tasen ka asütsü, anungji oji tebulula bolur aser yamaji asenoka tangatetba kati arutsü atema shisalemsateptsüla. Naga nungersa asüyonga tasümang arongba autji mamanger kati bener arunungbo kecha balaka tesüngmangtsü melila saka Yisu dak amangertemiang tasümang arongba aut bener aruba jagi nübortem rongnung ken o lemteptsüsa akümer. Iba ama mapang ka nung asenok ajaki angatettsüba kaji BJP telok ya yimten telok ka saka tasümang arongba aut ayong nung enoktsüba inyakyimjibo tamangba yimsü lir. Tamanger mesüra amangba purtem tetezü asenoki mangu saka lir ta amanger mesüra ataloktsü ta amanger. Iba amaji asenokia Yisu Khrista-ji Tsüngrem chir aser asenok menen asoshi sür shia aru ta amangra tekümtet angutsü ta amanger. Iba amaji Hindu tamangba yimsü nunga nisung sür külen alitsüba lima tajung ka lir ta amanger aser idakji küm meyirijang aika jangratema alitsü atema nisung asoshi tekümtet nüngdaker. Aji oda, kodang nisung ka sür iba temangji arongba autji bener oa temeshi ayong ka nung enoktsüdir, idangji tasüsangji alima nung alidang tai aika mena aliyonga tekümtet angur aser kotak lima nung küm meyirijang aika jangratema alir. Ajisüaka, nisung sür temang arongba autji ayong nung meinoktsüra mesüra enoktsüyonga jungjunga külemküja ser meinoktsüra tasür tanülaji alimai meyipa arua kinungertem nem timtem agütsür ta Hindu nungertemi amanger. Atangji, iba amajia ataloka alitsüa akok saka asenokibo iba yimsü aser tesayuba nungjibo mamanger. Ano, nisung sür külen tasümang arongba autji, shitakba nungbo, ayong mashi ka nung enoktsütsüba masü saka temeshi ayong nungang enoktsür aser Hindu nunger asoshi ayongtem ajak rongnung temeshitiba ayongji Ganga ayong ya lir, anungji Hindu nunger sür arongba aut iba ayong nungjiang enoktsür. Iba amaji tasür tanüla tekümtet ngur tesünep aser tepela agi sünga kotak nung alir ta parnoki amanger. Nisung sür arongba autji Ganga ayong nung enoktsüba ajanga tasürtemi menaba tai adoker aser tekümtet ngur kotak nung alitsü ta amanga tenzükba otsüji küm aika jakdang atalokba otsü lir. Tanü iba otsüji yangi mezülumatsü. Atangji, Atal Bihari Vajpayee ya Hindu nunger aser BJP telok ya parnoki tenzükba yimten telok ka lir, anungji Hindu nungertemia aser BJP telokia pa nem aküm teperi agüja tenüng asangtsü tim. Ano, Vajpayee dak tajung kaji, paji BJP aser Hindu nunger süaka pai tangar yimten telok aser tanga tamangba yimsütem nema kasasa akümtsübu agüja züngshi, iba jagi aikati Vajpayee yabo BJP prime minister masü saka nübortem prime minister liasü ta aküm agüja menungraa jembir. Ibaji shitak lir aser pa alima nung taküm meliaka lir ama züngshitsüsa government-ia pa nüng nung mapa tajung karbo nübortem asoshi inyaktsüla. Ajisüaka,  Hindu yimsü nung putirtemi masü saka government-iang Vajpayee temang arongba aut state ajak nung belenshia bener oa ayong mashimashi nung enoktsübajibo meshitaki inyaker asütsü, kechiyong itemji yimten yimsüsür mapa masü saka putirtem mapa lir. Ashiko, ibaji junga mangateti asür nem aküm agütsüba yimya ka ama state ajak nung autji belenshi asütsü akok, saka yimten mapabo pa sür anogo tenet linük ajaklen mangyima amongba mapa jagi perir. Atangji, tamang dang junga amangra, yimten yimsüsürtemi tamangba yimsü dak keta aliba mapatemjia inyaktsüa akok, ajisüaka shitakba amanga inyaker asü mesüra tema tazütsü agi Tsüngrem masü nübortem mulung chidaktsütsü inyaker ta asübaji tongtibang asütsü. Aji oda, asenokia nisung tasümang arongba aut ayong nung enoktsüba agi tanüla kümzüker ta amangra, Naga KhristantemiVajpayee aut bener arua Nagaland ayong nung enoktsübaji shitak asütsü ! Ibaji shitak mesüra asenok tamang jenjang khen jungjunga reprangshitsüsa kümogo.