Vajpayee indang memorial sangküm Republic Day nü semzüktsü

New Delhi, Luroi/August 27 (Agencies): BJP-i taoba mapang Ato kilonser, Atal Bihari Vajpayee indang memorial ka yanglutsütsü telemtetba agiogo.
Taoba mapang Ato kilonser, Vajpayee ya tan ita 16 nü New Delhi nung asü.
Memorial ji Rajghat anasa Rashtriya Smriti Sthal nung yanglutsü. Iba tesem nung Bharat Ratna angusang Atal Bihari Vajpayee tasümang rongdoka liasü.
Vajpayee indang memorial ji Rongjui/September 15 sülen nungi yanglu tenzüktsü aser team ka dang iba mapa tekaraba nung tenzüka mapang shidak nung renemtsü tuyuogo, ta osang angazüker.
BJP bangdak lenirtemi iba memorial ji taküm Luchii/December 25 tashi nungbo renemdaktsüner iba anogo ya asür Vajpayee asoba anogomong lir.
Ajisüaka iba memorial yanglutsü asalentong apibo team jagi iba mapa sangküm Aenjeti/January 26 tashi nungang yangluzüktsü ta shiogo.
Vajpayee indang memorial ji sangküm Republic Day nung semzüktsü, ta kasa osang ajanga metetdaktsü.
Iba memorial yangluba ajanga lenmang ka nungbo BJP-i parnok meyong ‘Rajghat’ ka angutsü.
2019 Republic Day sentong nung tongti tejaokeri Vajpayee samadhi nungji akhüm agutsütsüa akok aser Rajghat nung Mahatma Gandhi indang Samadhi-a semdangtsü.
Sangküm Republic Day sentong nung tongti tejaoker atema Modi sorkari US Tir, Donald Trump jaoka lir, ajisüaka tang tashi nungbo US-i telangzüba aguja mali.
Taoba mapang Atal Bihari Vajpayee-i aniba sorkari Lutyens Delhi nung official bungalows ji linük lenirtem indang memorials mekümdaktsütsü lemteta liasü. 2000 küm Cabinet-i iba dak sendakba telemtetba ka agia liasü. 2014 küm nunga Modi-i aniba Cabinet-i official bungalows, memorials mekümdaktsütsü lemteta liasü. Taoba mapang Union minister, Ajit Singh-i pa indang 12, Tuglaq Road bungalow ji pa tebu aser taoba mapang Ato kilonser, Choudhary Charan Singh indang memorial kümdaktsütsü atema akhangba sülen hopta ishika lir sülen official bungalows memorial mekümdaktsütsü atema Cebianet-i lemtet.
Vajpayee indang Krishna Menon Marg bungalow ji memorial ka mekümdaktsütsü, anungji BJP-i Vajpayee samadhi ji Rashtriya Smriti Sthal nung yanglutsü.
Taoba mapang India Ato kilonsertem- Jawaharlal Nehru, Indira Gandhi aser Rajiv Gandhi nung memorials ji Congress atema nüngshitem lir. BJP atema iba ama maongka maliasü, anungji Vajpayee samadhi ajanga ibaji ataloktsü.
2013 küm Congress-i aniba UPA sorkari linük lenirtem indang asüpila sentong agitsü atema Rashtriya Smriti Sthal tesem shimteta liasü.
Vajpayee tasümang arongba tesem nung BJP-i Rashtriya Smriti Sthal nung mezüngbuba Samadhi yanglutsü.