‘Valour Day’ sentong ayonga kaogo

Dimapur, Rongchii/April 9 (TYO): CRPF sepaitemi taküm bendanga agütsüba aser parnok tasü tait mapa nüngtem nung 78 Bn CRPF pur tanü, April 9 nü Unit Hqr, Zubza, Kohima (Nagaland) nung ‘Valour Day’ mungogo. Iba sentong nung Second-In-Command, Commandant (AOD)-78 Bn CRPF, Ram Chandra aser senior officers o Jawan temi Jai Jawan Memorial nung naro tokja asürtem nem akhüm tetushi agütsüogo.
Küm shia ‘Valour day’ ya April 9 nü amunger. 1965 küm iba anogo CRPF, 2nd battalion nungi company pezü-i Gujarat kübok Sardar Post nung Pakistan nunger sepai 3500 nokdang. Iba rara nung CRPF sepaitemi Pakistan nunger 34 khasetba den parnok 4 taküm apu aser kasa mapang nung CRPF sepai 8-i linük asoshi pei taküm bendanga agütsü.
Iba rara nung CRPF sepaitemi tasü ita nokdakba maneni bilemtettsü aser CRPF sepaitem parnok dak tateshitsü agia ajungmesotsü nükjidong nung küm shia April 9 nü ‘Valour Day’ amungtsü telemtetba agi.
Iba anogo 78 Bn, CRPF puri Unit Hqr Zubza, Kohima nung sentong balala ayongzüka kaogo. Anepdang 5:00 ako nung iba unit kübok aliba ketdangser aser sepaitemi Unit campus nung “Swacch Bharat Abhiyan’ ajungkettsü atema “Shramdan” sentong nung shilem agi. Iba sülen 9:30 ako nung sepaitemi Jai Jawan Memorial nung asür sepaitem nem akhüm tetushi agüja naro toktsü. 78 Bn CRPF, Second-In-Command, Commandant (AOD) Ram Chandra-i iba anogo amungba koda tongtibang iba indang lemsatep. Nikongtsütsü Badminton competition aser sobaliba sentong ayongzüka aka aser iba sülen benjung ayonga chichiyongtepa liasü, ta ketdangser sangdong ka ajanga metetdaktsü.