Varanasi dena smart city 27 sangdong

New Delhi, September 20 (Agencies): Mongolbarnü Ato kilonser, Narendra Modi’er Lok Sabha constituency, Varanasi densema Smart Cities 27 sangdongogo.
Tang shimba smart cities rongnung Vadodara, Agra, Nagpur, Ajmer, Amritsar, Gwalior, Thane aser Thanjavur yimtitem densema lir. Yimti 27 smart cities küma terenlok mapa inyakba nung sen crore 66,883 shi intoktsü.
Tang tashi nung Urban Development Ministry-i states aser Union Territories 27 nung smart cities 60 sangdongogo. Joko Uttarakhand aser Jammu & Kashmir densema state teku nungang smart cities shimtsü anünga lir.
Tang shimba smart cities rongnung timtibaji Maharashtra nung yimti pongu shima lir, aser item yimtitem ya tanü Union urban development minister, M Venkaiah Naidu-i sangdonga liasü. Tanü sangdongba yimti rongnungsa Tamil Nadu aser Karnataka na nungi yimti pezüzü, Uttar Pradesh nung yimti asem, Madhya Pradesh, Punjab aser Rajasthan shia nungi yimti anana, Madhya Pradesh, Andhra Pradesh, Odisha, Gujarat, Sikkim aser Nagaland nungi yimti kaka lir.
Ministry ketdangsertemi ashiba agi, mezüng shimba smart cities 20 nung projects 82 teinyakdak lir aser kobi melii project 113 tenzüktsü.
Smart City mission kübok Central sorkari taruba küm pongu nung yimti shia nem sen crore 500 agütsütsü aser state temia sen inoksemtsütsü.
Tanü Centre-i sangdongba smart cities 27 ji- Agra, Ajmer, Amritsar, Aurangabad, Gwalior, Hubli-Dharwad, Jalandhar, Kalyan-Dombiwali, Kanpur, Kohima, Kota, Madurai, Mangaluru, Nagpur, Namchi, Nashik, Rourkela, Salem, Shivamogga, Thane, Thanjavur, Tirupati, Tumakuru, Ujjain, Vadodara, Varanasi aser Vellore yimtitem lir.