Varun o Shraddha nati Jawan 40 nem aküm agütsü

Tsüklai/February 16 (Agencies): Jammu & Kashmir kübok Pulwama district nung tawa kiralongrar temi amakba mapang CRPF jawan 40 tashi taküm sama liasü. Tang, iba lendong ajanga linük mangyim jashi tia nung alidang ‘Street Dancer 3D’ team-i minute ka süngjema item asür jawan aser kibong tem nem aküm tetushi agüja liasü, ta osang ajanga metetdaktsü.
‘Street Dancer 3D’ team nungi Varun Dhawan, Shraddha Kapoor, Remo D’Souza aser project nung crew temi aküm agütsü. Item asür jawan aser parnoki toktsür aoba kibongtem nungittsü aser sarasademtsütsü asoshi team puri fans tem dang social media ajanga ajungshia liasü.
Kiralongrari amakba mapang nung, “Street dancer 3D” film nung tongti shilem agisang Varun-i social media ajanga iba maparen aija, “Jai Hind. Ni raratsü atema kodanga bilema meliasü saka mapang talangka atema asen linük sepaitem timtem terokong tia ajangshia aruogo kechiyong asen tsükchirtemji tasümait lir. Kiralongrar (tsükchir) temi lendong benser arutsüba ya tang asenoki telangzüba tajung agütsütsüla,” ta ashi.
Maneni, Bollywood stars talisa Shah Rukh Khan, Akshay Kumar, Kangana Ranaut, Shabana Azmi, Rishi Kapoor, Ranveer Singh, Priyanka Chopra aser tanga tongtibang actor aser actress temi asur kinungertem den tejashi lemsatepa liasü, ta kasa osang ajanga metetdaktsü.