‘Vasundhara entrepreneur award’ Shillong nung agütsütsü

Shillong, September 17 (Agencies): Sankar Mission of Guwahati-i acha ayanga tanabuba Northeast tsür ‘Vasundhara Entrepreneur award’ September 19 nü Shillong nung agütsütsü sentong lir. Sentong nung Northeast (NE) India tsür business nung sempet tulu keta alir parnok teshimtet ti nem senpet agütsütsü aser parnoki rongnung ka nem 2013-14 küm atema business tsütsü inyakba nung jenjang tematiba senpeta agütsütsü.
Iba sentong tulu nung Chief General Manager, Financial Markets Operation Department, Reserve Bank of India, Mumbai, M. Rajeshwar Rao tongti tesemdanger asütsü.
‘Sreemanta Sankar of Guwahati Mission’-i iba senpet agütsüba sentong ya 2014 küm tenzüka liasü aser iba sentong yagi NE nung aliba state ti prongla amshir.
NE nungi tetsür shirnoki nüburtem renlokdaktsütsü nükjidong nung business inyakyim balala nung kanga bendanga agüja inyaker, parnok iba senpet asoshi shimteter. Iba senpet agütsütsü shimtsü asoshi tentet ka lir aser parnoki küm nung state shia nungi business nung takok ngua inyaktetertem shimteter.
‘NE Woman Entrepreneur’ 2013-14 atema iba tenteti Vasundhara award asoshi shimtetertemji Lata Lepcha, Sikkim, Toko Likha Yaram, Arunachal Pradesh, T. Jemima Achumi, Nagaland, Moiregthem Muktamani Devi, Manipur, Lalhimpuii Hmar, Mizoram, Sukla Rani Debbarma, Tripura, Queency Thangkhiew, Meghalaya aser Kanta Dey, Assam nunger lir.
Iba award agütsütsü asoshi shimteta alir tetsürtem yagi business asoshi tetuyuba aser nükjidong tajung den meimlaba shisatsü aika sayuogo.
Nagaland nungi T. Jemima Achumi-i shi agi tachitsü tapu balala yangluba (processed meat) kol aika Germany aser France nungi bener arua yanglur, Arunachal Pradesh nungi Toko Likha Yaram-i Banderdewa nung chiyungtsü meraksatsü atema mokonga ayuba (cool storage) ka amenoka lir, Manipur nung Moiregthem Muktamani Devi-i wool ang agi tsüngsen mechia India army dangi yokba den külemi UK, Australia aser Korea linük temia yoker. Parnok mapa ya teburi amokbanger aliba business lokti nung kanga tang tatishitsü tajung lir aser ibaji ajanga parnok nem tetushi agütsütsüji talang, ta Sreemanta Sankar Mission of Guwahati nung tongti tezülula Asomee Dutta Baruah-i ashi.
Parnok rongnung temaba jenjang agula nem trophy, certificate aser sü tabentsü ka den sen 25,000 agütsütsü aser state ti nungi shimteta alirtem nema trophy, certificate aser sü tabentsü den sen meyirjang ter-er agütsütsü renema lir.