VEC ajung nungbo !

Nagaland nung government school-tem majungba indang jembidang VEC mesüra WEC ajung nungbo school-ji jungla ta bilemer. Tang tashi nung Nagaland government-i Nagaland tesem ajaklen kasasa junga renloktsü asoshi sentong yangluba tajungtiba anaji ka VDB tentetba ya aser kaji Communitisation sentong asütsü. Iba sentong ana yagi yimtak yimtsüng nung terenlok mapa inyaktsü asoshi yimtaklirtem nem tashi agütsür. Akhidangbo Rural Development department kübok yimtak yimtsüngtem nung terenlok mapa inyaktsü asoshi department nung ketdangsertemi dang sentong yanglua inyak, anungji yimtaklirtemi mulungba masü department nisungi mulungba dang inyak. Ajisüaka, VDB tenteter külen nungibo department-i sen dang agütsür saka mapabo yimtaklirtemi mulungba inyaker. Iba kasaji kaketshisatsü angazükba maparen nunga akhidangbo School Inspector ajanga Education department-i dang repranga liasü, anungji Inspector-temi school khen khen semdanga aoba dak alaka yimtak mesüra town nung süaka mepusanger yimten dak school repranga anepalutsü tashi mali asü. Ajisüaka, küm ter shi jakdang Nagaland nung Communitisation  sentong tenzükba ajanga tangbo government school shia nung VEC mesüra WEC lir.  Anungji, tangbo anogo shia kiburi school-ji repranga anepalutsü akoker. Aji oda, tangbo government school majungbaji School Education departemt nung ketdangsertem masü saka VEC aser WEC purtemi temulung magütsüba agi mesüra shitak meinyakba ajanga asütsü. Tanü asenok ajaki kanga junga angatettsüba kaji tanü asüng department ajanga tatidang agir shimer tesayur lanurtem yabo jungjunga azüngba lanurtem lir. Ano, tajung kaji parnok aikati ita sen atema masü saka tesayur mapaji linük aser Tsüngrem tenzükba mapa nung inyaker ama bilema bendanga agüja inyakner. Anungji, tanübo government school nung taila tesayur inyakba mesüra tangar temelen (Proxy) yoka inyakdaktsüba osangbo malitsüla, kechiyong iba ama tim masüba mapaji VEC aser WEC memeteti inyaktsü makoktsü. Ajisüaka, tesem balala nung kakeshir telongjemtemi mita aoba mapang kaktereju aika nung tesayur shitak maliba aser ano kar nungbo tangar temelen inyakdaktsüba mapatem putetba osang angashir. Iba ama osang angashidang, kechiba VEC ase WEC lir yamaji inyakdaktsür ta süngmanga bilemer. Ashiko, pei yimtak mesüra pei mepu nung asüyonga school nungji pei chirnur maliba ajanga temulung magütsür asütsüa akok, kechiyong tanü asenoki matong ka inyakbaji kidang kecha makayonga tanurtem private school-i dang yoker, kechiyong government school dang nungi private school-ang tajungba amai asenoki bilemer. Ibaji dokan nung oset mashi ka süaka sen aika meshibaji dang oset tajung amai asenoki bilemba amai lir. Ibaji asenoki khen jungjunga bilemdanger, asen yimtak aser asen mepu nung lapoka aliba government school-tem ya tajungba kümdaktsütet nungbo, asen lima nung temelenshi tajungji yang nung jagi tenzüktsü. Aji oda, asenok alidak government school-tem tajungba kümdaktsütsüji kecha tasak mali kechiyong government-i achayangtsü tashi ajak VEC aser WEC nem agüja lir. Anungji, parnoki dang tesayurtem ajak jadena sarasadem mapang tajung agia ajungshiteper sayudaktsü nungbo school-ji sayatenya agi ajunger ama küm ka ana tsüngda jungadoktsü.  Idangjibo asenok chirnurtem teimbaka government school nung angati kaketshisatsü tajung angutsü. Tanü yabo asenoksasa asenok shisamakaba agi timatemer dang, anungji asenoki asenok alidak government school lapoka yutsüba ya asenok meyong ama bilema anepalura, tangar school dang nungibo asenok meyong school-sa tajungba asütsü.